Okwa lopotwa oshiwana sha ninga oihakanwa yokukengelelwa kookalyamupombo ve lininga ovapolifi voipupulu tava kufa ko oimaliwa yovanhu keembaanga.
Omulumenhu weedula 36 okwa kanifa oshimaliwa oN$24 300 ya kufwa kombaanga yaye konima eshi a dengelwa ongodi komulumenhu ta ti ye omunambelewa wopolifi.
Oshiningwanima osha ningwa oshivike sha dja ko mOndangwa.
Omukulunhu koshikondo shokukonakona oimbuluma wopolifi moshitukulwa shaShana, omupedukomufala Fredrik Ndjadila okwa koleka oshiningwanima osho.
Opolifi oya hokolola tai ti nakuninga oshihakanwa okwa dengelwa komupolifi woipupulu ndele te mu lombwele kutya oye omukonakoni woimbuluma.
Kalyamupombo ou okwa lombwela nakuninga oshihakanwa kutya ota konakona oshibofa shaye shekwatonghonga osho yo sheteyo leumbo.
Kalyamupombo okwa popya eenomola adishe di li mondjila domavalulilo ombaanga yanakuninga oshihakanwa.
Otaku hokololwa kutya kalyamupombo na kale e na ouyelele welixwa po kombinga yanakuninga oshihakanwa shaashi okwa yandja ouyelele waye aushe womondjila.
Opolifi oya hokolola tai ti kalyamupombo okwa pula vali nakuninga oshihakanwa a yandje eenomola dikwao di li kokaboba kaye.
Otaku hokololwa kutya konima eshi a yandja eenomola kombaanga yaye okwa lopota oshimaliwa sha nanwa ko kombaanga yo-FNB pOlunkono mOndangwa.
Kape na omunhu a kwatwa po noshimaliwa inashi monika fiyo onena.
Oshiningwanima shikwao, osha ningwa koshitukulwa shaMusati omo omulumenhu weedula 55 naye a kanifa oN$4 600 konima eshi a tulwa mokatoo.
Oshiningwanima osha ningwa omafiku 31 omwedi wa dja ko omudo 2025 ashike opo sha lopotwa neudo.
Opolifi oya hokolola tai ti omulumenhu ou okwa dengelwa ongodi komulumenhu ta popi oipupulu kutya ye omunambelewa wopolifi ta longele koshikondo shokukonakona oimbuluma.
Opolifi oya koleka tai ti nakuninga oshihakanwa okwa li nale a patulula oshibofa shi na sha natango nokatoo omo kwa li a kanifa oshimaliwa omudo wa dja ko.
Kalyamupombo ou okwe mu dengela ta ti kutya okwa pumbwa okuyandja eenomola dopaumwene daye dombaanga opo a dule okutuminwa oshimaliwa osho a kanifa tete.
Okwa hekwa kutya oshimaliwa osha monika mboli omunhu oshikengelela.
Divadiva oshimaliwa shaye osha lopota sha dja ko kombaanga yaye.
Oimaliwa aishe inai monika nomakonakono opolifi otaa twikile.
Efiku keshe opolifi otai londwele oshiwana okupitila keeradio osho yo okuninga oiongalele tai yandje ehongo kombinga yokatoo ashike oshiwana natango otashi twikile okuninga oihakanwa.
Ehangano lo-MTC nalo ohali ningi oikonga yokuyandja ehongo nouyelele kombinga yakatoo ashike ovanhu otava twikile okutulwa mokatoo.
Okwa didilikwa ovakulupe ovo va li ovanashilonga ve li mopendjela paife ovo unene va ninga oihakanwa yokatoo.
Oshiwana osha kumaidwa opo shi xulife po okuyandja eenomola davo deembaanga dopaumwene kovanhu vehe shivike osho yo oku ya meenghundafana novanhu ngeenge ve li meembaanga.