Omukalo gokufika po omidhimba peha lyokufumbikwa, olya eta oompata moshilongo, unene pokati kaaleli yopamithigululwakalo, aayitaali, omahangano gokufumvika osho wo maakwashigwana sho yamwe taya ti osha uka ompanga yamwe taya ti kashi li mondjila.

Oompata ndhoka odhe ya po sho kwa li kwa pitithwa etengenekothaneko opo ku kale taku fikwa omalutu goonakusa peha lyokufumvikwa kelelondoolopa lyaWindhoek,  omolwomahala gomayendo taga ende taga pu ko. 

Aayitaali naaleli yopamuthigululwakalo yamwe oye li ompinge nondungethaneko ndjoka, netompelo kutya okufimvika omidhimba oko ashike ku li mondjila, no inashi uka okulundululwa.

Omusita gwongeleka yaEvangelican Lutheran Laban Mwashekele okwa ti payitaalo lye, okufika po omalutu goonakusa kaku li mondjila.

“Ombila yimwe otayi vulu okufumvikwa omalutu ga adha 10, taga fumvikwa pamukalo gokulondathana pakutungwa. Evi halo lyi kale etompelo oshoka ope na omukalo gokufumvika omalutu, peha lyokufikwa po,” ta popi ngaaka.

Mwashekele okwa fatulula kutya konalenale omalutu okwa li haga holekwa momaluhwa oshoka kakwa li aantu oyendji, onkene sho oshigwana sha ka enda tashi indjipala, okwa ka tamekwa okufimvikwa opo omasipa goonakusa kaaga monike.

“Okufumvika kolutu lwomuntu, esimaneko lyokuholeka omasipa gomuntu gaa monike,” ta ti ngaaka.

Omupopiliko gwelelo lyopamuthigululwakalo lyuUukwaluudhi Andreas Amunyela naye okwa ti, oku li ompinge nefikepo lyomalutu gaantu. 

“Katu na omukalo gu li ngaaka, iinima mbyoka ohatu yi uvu ashike tayi ningwa kondje yiilongo kaatiligane, ihe momuthigululwakalo gwetu katu yi ninga,” ta popi ngaaka.

Omupoliko gwelelo lyopamuthigululwakalo lyaNdonga Frans Enkali, okwa fatulula pamuthigululwakalo gwawo kutya ihashi ningwa ashike shoka  ohashi ikolelele kaakwanezimo yanakusa. 

“Okufika po omalutu goonakusa ihaku thiminikilwa omuntu, ohashi zi kaantu sha ikwatelela komayitaalo gawo,” ta popi ngaaka.

Tarah Shalyefu gongeleka Anglican, okwa ti payitaalo lyawo, okufika komalutu kaku na uupyakadhi washa.

“Tse Aa-angelican, katu na nando uupyakadhi nomalutu goonakausa taga fikwa po, oshoka natango omutoko ngoka ohagu gandjwa kaakwanezimo yanakusa,” ta ti ngaaka. 

Ta fatulula kutya aantu yamwe oya itaala kutya kashi shi esimaneko kuyo ngele omalutu goonakusa taga mbutu nokulika po koohwa, onkene oye wete shi li mondjila ngele taga fikwa po yo taya kala nomutoko.

Omupopliko gwelelo lyopamuthigululwakalo gwaNgandjera Shiimi Shangula, okwa ti omukalo ngoka kagu shiwike mokati kawo oshoka oya itaala kutya omuntu oha hupula ashike  ngele a mono oshipala shanakusa. “Olundji ngele aakwanezimo ya mono oshipala shanakusa opo haya itaala kutya omuntu ngoka e li moshiketha oye lela nokwa hulitha shili,” ta fatulula ngaaka.

Ta ti, sho nduno ehumokomeho tali ende lyu uka komeho, naantu taya ende taya indjipala, lyo evi ihali koko, shoka otashi vulu okuuvitha ko oshigwana opo ya itaale okufika omalutu gaapambele yawo, ashike kashi shi oshipu okuuvitha ko.

Mwene gwehangano lyontumba inaa hala lya tumbulwa kondandalunde lyokulanditha iiketha okwa ti etengenekothaneko ndyoka ita tsu kumwe nalyo.

“Shoka otashi ka shongolitha oongeshefa dhetu dhokulanditha iiketha osho wo okutunga omamanya,” ta nyenyeta ngaaka.

Ta ti, otaya ka kanitha ookasitoma oshoka itaya pumbwa we omandhindhiliko gomadhina osho wo iiketha yokufumbika.

Omukalimo gomoWindhoek Rosalia Ekongo, okwa ti, ota tsu kumwe nomalutu goonakusa taga fikwa po oshoka ita pu ka kala eyooloko pokati koosa dhaakengeli noohepele ngele tashi ya kiiketha nomamanya.

“Ethimbo ndino lyopayife omamanya otaga tungwa ga fa omagumbo, iiketha oyi na ondilo omanga oombila dha tegama nayamwe kaye na omamanya,”ta popi ngaaka.

Ta ti, omuntu ngele okwa sa, okwa hula ko, ina pu pumbwa we okulongitha oshimaliwa oshindji.

-vkaapanda@nepc.com.na