OTJOMUISE
Opresidenda Hifikepunye Pohamba wa raisa ongendo ye onene ohunga nongaro yo u kohoke no u veruke potuveze tuo mapangero ndji yaruka ombunda.
Watje mena rokutja ongaro oyaukise indji oumba ko u veruke na kominyo vyo vavere, yasere okutunwa tjimanga. “Katusere okuyandjera otuveze tuetu tuo u veruke okuyaruka ombunda no kurihavera. Ongaro indji ngaitunwe no kuhina okuwomba,” Pohamba watjere.
Oviveke mbya kapita ozongoramambo za raisire ongaro ndji zundapara potuveze tjiva tuo u veruke mehi mumuna onasareta ozonene indji ya Katutura no yo Mondivitivi mOtjomuise. Munao Opresidenda Pohamba wina otja raisire ongendo ye ohunga “nongaro yo u veruke ndjizundapara” ongondoroka notuveze tuo u veruke. “Potuveze tjiva ozondjuwo zarimbara ondjaya nu zehepa oku kohororwa. ….Tjingetjo kanawa kutja ozondjuwo zomara tjiva ozonganga, ovahunge no vaungure varwe vorupa rouveruke muvatura zena ondova,” Opresidenda yatjere.
Pohamba watjere ovatjiwe motjitamba ihi vasere okurira otjihorera nu ongondoroka yomara wao yasere okurira opakohoke nonyune okutara mo.”Munao otji meningire otupa atuhe tu tu rira tuo okukondja kutja otuveze tuo tjiwana itui otukohoke nu tutiziwa nawa.” Pohamba ongendo indji we iraisire Oritjavari pOmaraisire wOnguramene yOtjiwana yOndui yEhinga nEhinga.
O Ministera yOuveruke nOndumbiro yOtjiwana, Richard Kamwi, mongendo yOpresidenda Pohamba otja isanene ovanane avehe vo kombanda vorupa ro u veruke ko mbongarero Oritjavari ndi mariya pOndanda yOmahongero wOuveruke yOtjiwana.