Omukekwa wOindependent Patriots for Change, ousupi OIPC, komatoororero wOkarukondwa ka Tjombinḓe, Chester Katjanaa Kaurivi, ma tja ma utire imba okarukondwa pe kesirire momekurisiro tjaari orata yako okuza mo 2015-2021.
Edwin Iheka Kanguatjivi ma rarakana okarukondwa nga notjira tjOpopular Democratic Movement (OPDM), omuangu nerumbi otjozondekurona za Kaazuvara na Navita ngandu tji mazee ku za mu Hunu, mu varwe ovengi wina mbu mave rambere okarukondwa nga, mave kutwa kumwe.
Hapo tjii omo kutja ngatu rambe mundu wamama kutja ouṋe ngu ma katwera apehe tjeri umwe pweṱe na ove onganda aihe mai u ombunda? Kanguatjivi na Kaurivi kave nokurarakana okarukondwa uriri nungwari va tanda okukeisamo mounane wina wevere rawo oveni nguri Wenzel Kavaka wina ngumazu ku Kaazura.
Posi ya Kanguatjivi ma tja puwo aveyetatu kape na iho otjiṋa nandarire okaṋa okaṱiṱi ku ke ri po. Owo omuhoko wopewe ngamba. Tji mave tjitti aveyatatu okuyerurura ondondo yomararakaneno wouyara na wina onḓengu yawo auhe ngu maa kataara okarukondwa nga ma tjiwe kutja ke ketoorere ombo pehi nungwari we ke rukuturure motjikara itji tjinga aa ha kayene ku noukambe oukwawo utatu wawo mburi ovazandona va Kazuvara omukazendu Omukwahere.
Ma weza kokutja tjingetjo ovature va Tjombinḓe tji va toorora, ngu va toorora nu tje ha ungurire poo okuvepa ombwiro moure womananeno we kanaave katja kave perwe ovakekwa pekepeke nowo oveni omba toorora ingo ngu va toorora ngu hi nokuyeta ombwiro. Ondjo indji mai karira yawo oveni kanaave katja kavari nomuano warwe poo ovakekwa pekepeke okutara mo nokuripahera nokurivangera nokuritoororera.
Ma rire tji tja ṱoveni tji tji ha kara nombeze.
Mehungi re ku nOnampa Omandaha, Kaurivi wa tjere tjaari orata otjomurikuramene ovyunda vyomarandisiro nozondjira aaze karanyarwa otjorupa rovitjitwa vye vyomekurisiro. Ma tja wina wa rwisa ourunga wovinamuinyo mokarukondwa na ungura oukukutu kutja ovirata vyombazu mokarukondwa mbya zembirwe vi yetwe komurungu. Noporise ai pewa omasa noviungura vyayo avi pwire ko mena rohambwarakaṋa ye.