EENHANA-Omulumenhu weedula 42 okwa vati okwa dipaaa omukainhu waye shaashi vati a lombwelwa kundokotola kutya ounona vavo kave shi vaye.
Oshingwanima osha ningwa mexuliloshivike efimbo lokeengulasha mEenhana.
Lopokati opo omulumenhu Roland Kapule Hahoyo okwa yashwa fiyo omefyo kopolifi kononima eshi kwa li ta kendabala okulwifa opolifi vati e kwete ondjebo nombele.
Omukulunhu koshikondo shokukonakona oimbuluma wopolifi mOhangwena, omupedu Commissioner Zachariah Amakali okwa koleka oshiningwanima eshi.
Nakufya womukainhu okwa tongolwa oye Eva Leena Kalimbo, weedula 31 omukalimo womEenhana.
Ovaholafani ava okwa li hava di meumbo limwe nove na ounona vavali voukadona.
Okaana kamwe oke na heyali omanga okaana kamwe oke na odula imwe neemwedi hamanho
Pefimbo Kundana a talela po keumbo loKalimbo ova kwapata vaye ova hokolola tava ti Kalimbo okwa kala shito tava hepekwa komulumenhu waye shaashi okwa li ha dengwa shito nokuningilwa omatilifo edipawo.
Elina Vakwiwile ou eli omumwinakadona waKalimbo okwa hokolola ta ti okwa kala shito hatu minwa omatumalaka kuKalimbo kutya ota hepekwa koHahoyo.
“Ketameko lomwedi Septemba oda dengelwa ongodi kuHahoyo ta ti kutya okwa li a twala ounona kundokotola koDNA konima eshi auda kutya ounona kave shi vaye,” ta hokolola.
Okwa ti efiku landula ko okwa tuminwa yoo vali etumwalaka kuKalimbo ta ti kutya Hahoyo okwa li a twala ounona koDNA ashike oidjemo otai ulike kutya ounona kave shi vaye.
“Okwa li nda komwa molwashi ounona ova fa Hahoyo,” ta ti.
Okwa hokolola ta ti okudja opo Kalimbo naHahoyo ova kala vehe na ombili meumbo.
Okwa ti Olomakaya mokati koufiku okwa dengelwa ongodi kovashiinda vaHahoyo tava ti kutya Kalimbo otave li denge namwene.
“Okudja opo onda endelela opo ndi ye keumbo lavo. Manga ndi li mondjila onda shakeneka naHahoyo ndele ta nyekenge ongodi yange nokonima okwa dengange enghava moshipala ta ti kutya ondi mulodi nokufaduka po ouka moixwa,” ta ti.
Vakwiwile okwa ti okudja opo okwa ya keumbo lavo nokwa hanga Kalimbo e li mekungu lohonde a kalelwa keembele mbali, ekatana nomupini.
Okwa ti Kalimbo okwa tetwa momunino nombele nokudengwa nomupini.
Okwa kumaida ovakainhu vakwao opo va kale tava lopotele opolifi ngeenge tava hepekwa kovalumenhu vavo.
-fhamalwa@nepc.com.na