Shangeleo Festus ngoka eli momumvo gwe gwotango moshiputudhilo shopombanda shelongo mOngwediva, okwa kumagidha aanyasha ooyakwawo mboka kaaye na iilonga, opo ya nyangadhale nakehe shoka taya vulu yo ya mone omboloto.
Festus okwa yambukile mOshakati, molukanda Uupindi. “Onda kanitha aakuluntu yandje omanga ndi na omimvo mbali, sho ya hulitha moshiponga shohauto. Kandi ya shi kiipala, ohandi ya mono ashike momathano. Onda tekulwa kukuku ngoka naye a huluko omimvo mbali dha pita,” ta hokolola. Festus okwa ti, ehokololo lye ele, nongele okwa tameke okuhokolola, ita mana.
Ta ti, okwa kala nokukumagidhwa kuyinakulu, a tule eyilongo komeho, ye a dhimbwe yuuyuni, ta ti osho a ningi.
“Inashi kala oshipu, ashike onda kondjitha sigo nda sindana. Mongundu 12 ondali nda mono iitsa 37, nonando okwali nda hala ndi nyanyudhe woo KuKu gwandje, Kalunga ine shi pitika we,” ta popi ngaaka.
Ta ti, ye okwa valwa oye awike kaakuluntu ye, ashike oku na aamwayinagona.
“Okwali ndina elalakano lyokuhulitha po osikola oshoka ka kwali pe na ngoka ta yambidhidha ndje. Ashike Kalunga okwa kala pamwe nangame,” ta ti ngaaka.
Festus ta ti, esiku limwe te ende ta zi kosikola, a uka kegumbo, okwa li a thikama momuti gumwe nokwa lili, ti ipula kutya oshike e na okumona ihuna, omanga aanona aakwawo ye li miiyenditho, ye ta ende koompadhi. Kegumbo ita adha ko iikulya.
“Tate Kalunga omunene, manga tandi lili ndi li momuti moka, kongodhi yandje okwa li kwa lopota oshimaliwa N$4 000, okwa li sha halutha ndje, nonda kala ndi na omayipulo kutya osha zi peni,” Festus ta hokolola.
Ta ti, esiku ndyoka okwali lya piti, ihe kape na ngoka a dhenge ta pula ngele okwa mona oshimaliwa nenge pamwe epuko.
“Ondali ndalandula onomola ndyoka , ongodhi okwali ya yamukulwa komusamane, ondali nde mu lombwele shoka sha holoka, omusamane ngoka okwa li pulandje omapulo,no kwali ndemu hokolele ashihe,” ta popi ngaaka. Ta ti, okwa li e mu pandula noonkondo, anuwa oshimaliwa okwali ta tumine omuniilonga gwe e li kohambo, nokakwa li eshi ngele inashi thika,” ta ti ngaaka. Festus ta ti, omusamane ngoka okwa ti, nagalule ashike N$2 000 omanga gaali naga ninge po ge, oshoka ngeno ine ga mona.
“Okwa li tandi ipula kutya uulilingi, ihe nani otate Kalunga ashike. Onda li nda matuka tandi ka landa oonyanga, omatama, omahapela niikwawo oyindji, nonda li nda tameke ongeshefa yandje,” ta popi ngaaka.
Ta ti, ngashiingeyi oha landitha uukwashikependjewo pooha dhopate.
“Paife ohandi mono oshimaliwa shandje shokuya kosikola, kandi na we uupyakadhi,” ta popi ngaaka.
Festus okwa ti, etameko aluhe edhigu, oyendji otaya ti, itaya vulu okulanditha omanga ye li koshiputudhilo shopombanda.
Ta kumagidha ta ti, thikameni mwi ilongele kune yene, inamu tegelela we okupewa, oshimaliwa kashi na olwaala.
Hugunina okwa popi ta ti, paife oha landa iikulya ye mwene nokufuta omeya ge, itaa hehela we.