WINDHOEK – Omukiintu gwomimvo 21 okuli moshipangelo shakatoolika mOshikuku moshitopolwa shaMusati moka e li ta mono epango sho a mono okanona hoka a umbila moshilambo shonyata mokandjugo konima sho a pulumutha.
Oshiningwanima shika osha ningilwa pomukunda gwedhina Ogongo moshitopolwa omo tuu moka mOmaandaha potundi onti 18h00.
Omukiintu ngoka e shiwike nawa kuKundana ihe ita tumbulwa oshoka ina holoka natango mompangu okwa hokololwa aniwa a ekelehi ohanona ndjoka woo ya li ya valwa onkiitu konima ashike sho e yi mono komatango gOmaandaha goshiwike shika.
Omutamanekwa ngunka oku li omvalele yomomukunda Okapya moshikandjohogololo shaGongo.
Omukoonakoni gwiimbuluma moshitopolwa shaMusati Deputy Commisioner Moses Simaho okwa hokololwa kutya ohanona ndjika oya itsuwa kuyinakulu sho a uvu okanona taka lili okuzilila mokandjugo.
“Yinakulu oye a mono ohanona ndjoka sho a uvu tayi lili. Nokwa li a ka tala e ta ithana oontaliyisho ndhoka woo dha tseiyithile opolisi,” osho Simaho a hokolola ngaaka.
Simaho okwa hokololwa kutya ohanona ndjika oya li ya hilwa mo moshilambo moka e tayi kuthwa mo nokufalwa koshipangelo nayina hoka ngashingeyi ye li taya mono epango.
Simaho okwa ti mbaka ayehe oye li ya kwatelwa moombete onkene otaya hokololwa ye li monkalo ohwepo notayi nuwa omeya.
Nakuvala nguka aniwa ngashingeyi oku li moshipangelo moka kohi yetonatelo lyopolisi oshoka okwa tegelelwa a ka holoke mompangu meendelelo ngele a ti po hwepo na ngele okwa lalekwa mo moshipangelo moka.
Aniwa inashi yela nduno kutya ngashingeyi oku li mo ta yamitha omona nenge omona oku li momake gwoshipangelo.