Omulumenhu womukwashiwana waAngola weedula 28 vati okwa dipawa nombele yokapi komulumenhu oo kwa li tava tanguna naye keendingosho.
Oshiningwanima eshi osha ningwa Omaandaxa komukunda Okashakati moshikandjohoololo shaKongo mOhangwena efimbo lokonguloshi. Nakufya edina lalye natango itali dulu oku tumbulwa molwashi ovakwapata vaye ina va shivifilwa efyo laye.
Omukonakoni woimbuluma moshitukulwa shaHangwena omupedu Commissioner Zachariah Amakali okwa hokolola ta ti nakuninga oshihakanwa okwa tuwa nombele lwoikando ivali medimo osho sha etifa omandjandja a nuke mo.
Omufekelwa okwa twalwa koshipangelo shaEenhana nokonima okwa tuminwa koshipangelo shaNandjokwe, oko a xulifila efiku olo, konima yokafimbo eshi a fika moshipangelo. Opolifi oya hokolola tai ti omufekelwa weedula 28 okwali a faduka po konima eshi a longa oshimbuluma, ashike okwa kwatwa po Etitatu a hangika a hondama moixwa. Omufekela ota hokoloka momhangu yaMangestalata mOkongo, ta pangulilwa oshibofa shedipawo.
Opolifi oya kumaida oshiwana opo shi xulife po okuumbata oilwifo ngaashi eembele, omakatana neendjebo ngeenge tashi i keendingosho, shaashi osha nyika oshiponga.
fhamalwa@nepc.com.na