Oshivilo shomaudano oo taa ka kala mOshitukulwa shaHangwena osha djuuka ko.
Walde Hamunyela, omunambelewa umwe womehangano lo-PST Bet okwa ti oshivilo eshi otashi ka kala ko momwedi tau uya. Ta ti kutya ehangano lavo ola tula po oshimaliwa shi fike poN$210 000, opo shi dule okulongifwa momaudano oo oule weedula nhatu. Hamunyela ta ti eshi sha kufa ehangano laye meendabo, osheshi kwa didilikwa ovanyasha vahapu ve na oitalendi ya patelwa kondje, shaashi ihava pewa omhito yo ku yi ulika. “Ovanyasha ova pumbwa ngoo okukala hava kala ve na oshinyangadalwa have lipyakidile nasho,” Hamunyela ta weda po. Mokutambula ko oshietwapo eshi, ngoloneya woshitukulwa shaHangwena Walde Ndevashiya, okwa ti elalakano lokuninga oshitufi sholudi eli, okuyoolola oitalendi mokati kovanyasha, vo va tale ko oitalendi oyo onga omaifano. Okwa weda po kutya oshinyangadwalwa eshi oshi na elalakano liwa, unene kovanyasha oku va kaleka noshisho nohokwe yomaudano.
Ndevashiya okwa tumbula kutya omaudano a yooloka taa ka danwa ongaashi etanga lokeemhadi lovamati noukadona, etanga lomokambaba, oshoyo oudano wokutondoka.
Ndevashiya okwa tumbula yoo kutya ovanyasha vomoshitukulwa shaye kave na lela eshi tashi va ndjungula shihe fi omaudano. Oinyangadalwa yoludi la tya ngaha oi na oshilonga shakula shaashi otai kwafele okuyambidida mokweeta oshimaliwa moshikefa shepangelo.
Ngoloneya okwa ti yoo, okwa teelela ovanhu aveshe ava va tokola okukufa ombinga momaudano aa va kale ve li mewi limwe notava longele kumwe.
Kakele kokuludika oitalendi, omaudano aa otaa ka yandja yoo eemhito doilonga, unene tuu keengeshefa dinini nodopokati. “Ovanhu ava tave ke uya okulandifa oinima yavo pefimbo opo ottava mono po okashona kavo,” Ndevashiya ta tumbula.