Okakomisi kokuungaunga (ECN) nomahoololo moNamibia onghee ngaa ta ka twikile nokuninga omahoolo opaukansela awedwa po nanande moshilongo muna ombuto yoCovid-19.
Omupopiliko waECN Lina Ndengu okwa holoka kutya ova pyakudukwa okukala va ninga omahoololo a wedwa po ookansela oo taa ka kala ko momafiku 25 Auguste neudo koshikandjohoololo shodoolopa yaKatima Mulilio.
Ndengu okwa ti oshi li oshinakuwanifa shokakomisi kavo oku kwatele komesho omahoololo omoshilongo, onghee natango ove li longengida oku ninga omahoololo a wedwa po koKatima Mulilo.
“Ombuto yoCovid-19 itai shi mbi nande opo tuha ninge omahoololo shaashi oikwafifo aishe opo i li yawana okulongifwa pefimbo lovanhu tava kahoolola. Onghee oshiwana inashi kala shina oumbada shaashi omilandu doCovid-19 adishe otadi kale kwa po efimbo keshe keenhele dokuhoololela,” Ndengu ta ti.
Okwa hokolola ta ti omwedi wadja ko okwa li kwa ningwa omahoololo a dwedwa po oo kwa li eli kodoolopa yaPuwo, oo kwa li a ende nawa nokwa li eli pauyuki, onghee ota ti natango okwa teelelwa omahoololo oo taa ka kala ko momwedi tauya opo a kale eli pauyuki.
“Ohandi kunghulile oshiwana opo shi li ufe komilandu doCovid-19 pefimbo tashi ka holola ovaulikwa vavo, ovanhu inava pitikwa okukala vena oilwifo ile vadjala omidjalo deengudu dopapolitika keenhele dokuhoololela,” Ndengu ta ti.
Ndengu okwa ti ovanhu ashike veli omulongo va pitikwa okukala veli meni lonhele omu ta mu hoololelwa omanga ovanhu vamwe okwa teelelwa opo va kale veli pondje. Onghee okwa ti elandulafano opo lili la wana, opo kukwashipalekwe kutya omilandu doCovid-19 oda tulwa po.
Okwa denga omufindo ta ti oshiwana nashi ye momwaalu munene opo shi ka hoolole kansela wavo ou sha hala, shaashi keshe omunhu e na eedula 18 oku na oufemba wokukala a holola omuleli waye.