WINDHOEK- Epulakeno lyina sha nokushunitha mo omahogololo oshoka aniwa oga ningwa paulingilingi itashi pulakenwa we ngula (mEtine) ashike onena mompangu yashiga ko moshilongo yoSupreme Court.
Shoka oshali sha tseyithwa komupopiliko koshikondo shuuyuki Ockert Jansen ngoka a hokolola kutya oshipotha shoka otashi ka pulakenwa potundi 10h00 yongula nena.
Oshipotha shoka shali sha tulwa mo komukuthimbinga mahogololo gopaupresidente a ithikamena Dr Panduleni Iitula oshali shi na oku tokolwa lwa hugunina mEtine ihe ngashingeyi osha etwa popepi monena.
Iitula nayakwawo yahamano oyali ya pataneke oshizemo, nomukalo gwa longithwa pomahogololo e taya yi kompangu kutya oye lwete elongitho lyomashina gooEVM kaali li pauyiki, niizemo yalyo kai shi okwiinekelwa oshoka itali ulike oombapila dhaampoka pwa hogololwa kaakwashigwana.
Oyati kutya yo oya hala owala omashina ngoka ga ze uumbapila mboka tawu ulike uumbangi kutya odho shili ngoka a hogololwa oye tuu a li a halika oku hogololwa kunakuhogolola.
Ngashingeyi oshipotha shoka sha pulakenwa kaatokolipanguli yeli yatano oshili mompangu onene yopombanda yomoshilongo, nonena otaya ka holola ngele oya tokola opo omahogololo ga shune mo nenge aawe.
Iitula nayakwawo otaya pula kutya omahogololo ngoka naga shunwe mo oshoka ka geli payuuki taya ti kiilongo hoka omashina ga za iha galongithwa oshoka inaga inekelwa.
Omukalelipo gwopaveta gwaIitula nooyakwawo okwali a holola kutya kiilongo yilwe mbyoka yali tayi longitha omashina ngoka EVM ngashingeyi oya hulitha po oku galongitha oshoka inaga inekelwa na ihaga gandja iizemo yoshili.
“Ashike ngashingeyi India ngoka eli oye a longa omashina ngoka na oko ga landwa kepangelo lyaNamibia oku pitila moECN, naye woo ita longitha omashina ngoka oshoka inaye ga inekela. Onkee Nambia okuli ashike oshilongo shoka tashi longitha omashina ngoka,” osho aapopilikoveta ya Iitula ya hokolola mompangu.
Ashike epangelo okupitila moECN lyo olya thikama koshinima shoka kutya etokolo lyelongitho lyooEVM kalya li nande oshinima shi ikundwa kiikololo, ihe olyali etokolo lyomutumba gwopashigwana moka oongundu adhihe dhopapolitika moshilongo dha kala hadhi kalelwa po.
Ngashingeyi omapu otaga ka za mumwe noongongo sho ompangu tayi katokola lwa hugunina kombinga yoontamanana ndhika, na ngele otaga shuna mo nenge itaga shuna mo.