Iiponga ya yooloka oya faalele oomwenyo ine moshitopolwa shaMusati mehuliloshiwike lya zi ko.
Omukulupe gwomimvo 67 okwa hulitha sho a pondwa konyama pothingo, shika osha li sha ningwa Etine lya zi ko momukunda Orange-yaNashimbuli.
Omukuluntu gwopolisi moshitopolwa moka okwa ti oshingwanima osha holoka potundi 18h00 yokomatango momudhingoloko gwaKalongo.
“Otaku hokololwa kutya omukulupe gwomulumentu ngoka okwa li ha zi nomumwayinakadhona ngoka a li a teleke omwiha esiku ndyoka. Okwa li a pondwa konyama ndjoka kwa li ta li, nokufalwa koshipangelo hoka a ka hulithila,” Shikongo ta ti ngaaka.
Nakusa okwa tseyika nedhina Lisias Kamati, a yambukile momukunda omo tuu moka. Omulumentu gwomimvo 22 okwa imangeleke Osoondaha ya zi ko momukunda Oshithashembungu, momudhingoloko gwaNesi.
Otaku hokololwa kutya omulumentu ngoka okwa li ya yi puushinda namukwawo gumwe gwaandjawo.
”Okwa li a shuna tango kegumbo, a thigi omumati ngoka a li a yi naye puushiinda. Okwa li a adhika moombuli dhondunda yomwiidhi, nondhalate mothingo ye,” Shikongo a hokolola.
Okwa tseyika nedhina Simion Iikasha January, aakwanezimo ye oya tseyithilwa nomakonakono gopolisi oge li metifa.
Moshiningwnima shimwe inaashi faathana aantu yatano oya li ya falwa koshipangelo monkalo yi nyanyaleka, sho ya li ya mono oshiponga shohauto.
Oshiningwanima shoka osha holoka Olyomakaya ga zi ko momukunda Okathitu Kambanda moshitopolwa omo tuu moka.
“Otaku hokololwa kutya ohauto yimwe okwa li ya pumu onkwawo, sho ya ndopa okuthikama yi tegelele onkwawo yi pite po. Okwa li ya pumwa e tayi galangata, moka mwa sile omuntu gumwe,” Shikongo a popi ngaaka.
Nakusa okwa tseyika nedhina Andreas Nehemia (36), a yambukile momukunda omo tuu moka.
Moshiningwanima sha faathana omulumentu gwomimvo 37, Ndjene Norbert okwa hulitha moshiponga shohauto Etitano lya zi pokati kOutapi noRuacana.
Shikongo okwa ti, omulumentu ngoka kwa li ta hingi ohauto yo-BMW, okwa li a kanitha okondolola yohauto sho a li a henuka ondoongi ya li ya thikama mopate, e ta idhenge mohauto yoToyota Hilux, kwa li tayi zi komeho ge.
Okwa li a hulithile poshiponga mpoka. Aakwanezimo ye oya tseyithilwa.