Lucas Tsamseb ou a shivika nawa nedina Irivari osho a lekelwa mo moshipangelo konima eshi a kala mo oule weemwedi nhee ta pangwa oudu wexuli.
Irivari vati okwa kala a nyika ounghundi eshi kwa li ita dulu vali oku ende nawa, yee okwa li a monika oupyakadi kexuli.
Irivari ota tengenekwa e li pomido 20 nokwa shivika nawa okupitila komalungula eshi a kala e na ouvidio tau nyanyuda oshiwana.
Kansela woshikandjohoololo Guinas Elia Marthinu okwa koleka ta ti Irivari okwa veluka paife onghee ota twikile nonghalamwenyo yaye.
Okwa popya kutya pefimbo eshi e li moshipangelo Irivari okwa kala a taalela omashongo oikulya onghee kansela okwa kala ta pula ekwafo moshiwana opo shi yambidide Irivari.
“Onda pandula oshiwana eshi sha kala tashi yambidida Irivari pefimbo kwa li a nyika ounghundi. Okwa kala nokumona omakwafo ngaashi oikulya, oikutu neefewa,” Marthinu ta ti.
Okwa weda po ta ti ovakwapata vaye ava tave mu file oshisho ihava longo onghee eshi okwa li eshongo linene okukala tave ve mu yambidida.
Kansela okwa ti naye okwa kala nokuninga eenghendabala dokuyandja oikulya noshivelelwa meumbo lavo ashike inai va wanena.
Marthinu okwa weda po ta ti onghee natango ota indile moshiwana opo shi yambidide Irivari noikulya shaashi kave na oikulya meumbo lavo.
Okwa ti kukeshe ou e na ehalo lokuyambidida na kwatafane nakansela konomola yongodu: 0812426759.