Lucas Tsamseb, omunyasha Omunamibia ngoka a tseyika nawa nedhina Irivari okwa thigala mondholongo omanga yakwawo ye li yatatu ya ifutila mo.
Irivari opamwe nookume ke yatatu oya li ya mangwa po kopolisi Etitano lya zi ko, sho ya li ya kwata omukiintu gwomimvo 18 koonkondo.
Omukuluntu gwopolisi moshitoplwa shaShikoto Armas Shivute okwa ti, oshiningwanima shoka osha holoka lwopotundi 01h00 momudhingoloko gwaShivelo.
Otaku hokololwa kutya aamati mboka oya li ya tsakanene nomukiintu ngoka, e tayw mu kwata noku mu humbuta sigo omondunda ye ethimbo kwa li ta zi kuundingosho.
Shivute ta ti, oya li ya kwata omukiintu ngoka koonkondo ayehe yane, taya paathana oompito.
Ta ti, aafekelwa moshiningwanima moka ayehe oya pewa ombooloha N$2 000.
Shivute a popi ta ti, Irivari oye ashike a thigala mo mondholongo, omanga ya kwawo ya ifutilamo.
Ta ti, etompelo lyokuthigala modholongo inali thika natango kuye.
Moshiningwanima inaashi faathna Theophilus Taati Shipahu 59, okwa li a gwile nokusa momukweyo gwombaanga onene yoFirst National Bank (FNB) mOndangwa Etitatu lyoshiwike shika.
Omupitithi gwomawuyelele mopolisi yomoshitopolwa shaShana Thomas Aiyambo okwa ti oshiningwanima shoka osha holoka ethimbo lyongula omanga kwa li a tegelela okumona omayakulo.
Shipahu ngoka taku hokololwa kutya okwa li omukuluntusikola kosikola yimwe kOshigambo okwa li a hulitha ethimbo olyo ndyoka.
Aiyambo ta ti, aakwanezimo oya li ye shi eta puuyelele kutya nakusa okwa li e na uuvu wosuuka notashi vulika osho shi na okukala sha etitha eso lye.
Onkundana ndjika sho ya li ya taambathanwa komalungula, oyendji otaya nyenyeta kutya ombanga yo-FNB ohayi kalitha aantu ethimbo ele momikweyo inaaya yakulwa.
Selma Ishiko gwomOshakati ta ti, ombaanga ndjoka oyi na omayakulo agehe ya pumbwa shili, ihe ohayi ende kashona.
“Otu na uuvu wa yooloka momalutu onkene nayi ninge omalunduluko, kaatu thikame we momikweyo ethimbo ele. Ondi uvite ko kutya ope na omayakulo haga vulu okupitila koongodhi ihe haatuhe tu shi okulesha nenge tu na oongodhi dhoshinanena,” Ishiko a popi ngaaka.