Kakukutu komatanga opolifi Sebastian Ndeitunga ota kunghulile oshiwana opo shi longele kumwe nopolifi pefimbo eli oshilongo shi na eendjindikila da tulwa po mwolwombuto yoCovid-19.
Meenghundafana a ninga naKundana Ndeitunga okwa ti oshiwa ngeenge oshiwana tashi longele kumwe nopolifi eshi opolifi tai longo oilonga yayo efimbo keshe. Onghee okwa ti oshiwana nashi liufe komalombwelo aa a tulwa po koveta kombinga yomalihumbato avo pefimbo eli lidjuu lombuto yoCovid-19 i li tai dana onghandangala moshilongo.
Okwa ti ina hala nande ombelewa yaye i kale tai lopotelwa oshiwana ile opolifi itai lihumbata nawa pefimbo eli. Ndeitunga okwa denga omufindo ta ti ovanambelewa vopolifi navo ova pumbwa okukala tave lihumbata nawa ngeenge tava longo novanhu.
“Opolifi nai kale tai popi novanhu nombili, opolifi nai fimaneke ovakwashiwana. Omunhu keshe okwa pumbwa okufimanekwa ngaashi ovanhu aveshe. Onghee onda hala opolifi i kale i na elandufano notai longo pauyuuki ngeenge i li moshikonga shokutula po elandulafano. Omunhu ina pumbwa okukala ta tilwa omalodu komupolifi tuu nande, osha puka neenghono,” Ndeitunga ta ti.
Kakukutu komatanga okwa hokolola ta ti ovanyasha ova didilikwa itaveli liufa komilandu doCovid-19, ta ti kutya ovanyasha kave hole okukala va djala oulapi vokomilungu, vo ove hole okukala va ngudumana peenhele domalihafifo ve li unene mumwe.
Onghee Ndeitunga okwa ti eshi nashi mone exulilo shaashi kukeshe ou ite ke lihumbata nawa otaka pewa ehandukilo.
“Ovakwashiwana nava longeleni kumwe nopolifi, inamu tuka opolifi, ina mu lwifa ovanambelewa vopolifi ngeenge tava popi nanye. Onghee kaleni tamu pwilikine kwaashi tamu lombwelwa kopolifi,” Ndeitunga ta ti.
Ndeitunga okwa ti opolifi oye lilongekida okukala ya tula po elandulafano moshilongo ashishe nokukwashipaleka kutya omilandu adishe doCovid-19 edi da tulwa po komupresidende woshilonga oda wanifwa po.
“Ngeenge omukwashiwana ina hala okuuda ko eshi ta lombwelwa kopolifi nena omupolifi naye oku na oufemba wokolongifa eenghono opo a kaleke po oveta nelandulafano. Ngeenge omunhu ite lihumbata nawa, hano opolifi oi na oufemba wokukwata po omunhu ndele ta falwa kodolongo opo a ka pewe ehandukilo lokufuta oshimaliwa,” Ndeitunga ta ti.
Onghee okwa ti oshiwana osha pumbwa okukala tashi likeelele okuninga oihakanwa yokuya meedolongo ile yokupewa ehandukilo lokufuta oshimaliwa shonhumba.
Okwa ti omukifi woCovid-19 owa nyika oshiponga neenghono, onghee oshiwana nashi liufe komalombwelo aa a tulwa po.