Minista gwiikwagumbo, omainyengo pokati kiilongo negameno Frans Kapofi okwa ti, oshigwana ngele tashi pula omakwatho poositasi nashi yakulwe meendelelo.
Minista dhoka okwe dhi popi ethimbo a li a patulula ositaasi yopolisi Etine lya zi ko kOshikuku moshitopolwa shaMusati.
“Otandi popi nda ukilila aapolisi, mboka itaaya gwanitha po iilonga yawo, ya kuutumba yeli komalungula omanga ya tegelela ondjambi yokomwedhi. Gwaniitheni po iilonga yeni, gandjeni omayakulo ngaashi ge na oku gwanithwa po,” ta popi ngaaka.
Kapofi okwa ti, aakwashigana ohaya ende oondjila oonde ya hala omakwatho, ihe ethimbo limwe otaya shunithwa ko oshoka omuntu ina hala oku gwanitha po iilonga ye. Ta ti shoka nashi mone ehulilo.
“Otandi indile omalenga omanene, ooyene yomikunda, aasitagongalo, opo ye ye po nooprogalama dhoku pulakena uupyakadhi wuli momidhingoloko dhawo aluhe, yo ya tale nkene ye na okukandula po omaupayakadhi ngoka,” ta kumagidha.
Ta ti, pa mukalo ngoka otaya hupitha omwenyo gwa gumwe, oshoka iiningwanima yimwe ohayi holoka oshoka oshigwana kasha na ontseyo mpoka shi na oku hokolola omawupyakadhi gawo, opo shi mone ekwatho omanga inaya longa omiiyonena.
Minista ta ti, ohashi kwelengendja nayi oku uva oonkundana oombwinayi miikundaneki ya kehe esiku, unene koshitopolwa shaMusati.
Kapofi natango okwa kumagidha oshigwana shi kale ko kule niikolitha niingaamathi, oshoka otayi shunitha oshigwana shaNamibia mo nima.
“Aakwiilongo mboka ye ya moshilongo muka taya landitha iingaangamithi naya shune kiilongo yawo, otaya teya po oshigwana shaNamibia,” minista a popi ngaka.
Omukuluntu gwopolisi moshilongo Sebastian Haitota Ndeitunga okwa ti, ope na aapolisi taya longo uulingilingi, ihe shoka nashi mone ehulilo.
“Otwa lopotelwa aanadholongo ye Ii 23, ya pitithwa mo kaapolisi modholongo, kaashili pa veta koshitopolwa shaZambezi. Kehe omupolisi aakwathele omunadholongo na kale emu mona, nongele inaye ya mona, otandi ka kutha etokolo lyahugunina,” ta ti ngaaka.