KATIMA MULILO – Bucwala bwa tombo ni macwala amañwi ahalifisizwe azibihala hahulu inge kachasu, abonahala kutisa kulyanga mwasikiliti sa Zambezi. Buñata bwa bashemi babonahala kuli habasakona kuina basanwi bucwala, ili taba yebahapeleza kusiya mandu abona kamapakela nikuyo kuta malungasiku, kusina yababalela banababona. Bucwalo bwa tombo ni macwala amañwi lilemuhilwe kuli lina ni kozi mi likona kufofaza makete amubili halinwiwa kufiteleza tikanyo.
Bucwala bobuñwi bwa tombo bulifisizwe kufita fa 80%, ili nombolo yeminahanya macwala amañwi asikuwa. Nihaike kuli tombo ikolwa kibabañata mwanaha, babañwi babonahala kuli hasakona kuina basanwi. Muyemeli wasilalanda sa Sibbinda Mickey Lukaezi ubilaezwa kitaba yakuli batu banwa hahulu bucwala mwasilalanda sahae. Naize kakuba muyemeli hana maata akuhapeleza malekisezo abucwala kukwala kanako.
“Mapampili aba lumelela kulekisa bucwala aswanela kutalimiwa kuli ano balaela kukwala kanako. Luna ni likozi zeñata zafamukwakwa zetiswa kibatu babakozwi. Halukoni kuzwelapili kulatehelwa kibatu baluna. Kuswanela kuezwa sesiñwi kuli manwelo abucwala ano kwala kanako,” nekubulezi Lukaezi. Mubusisi wasikiliti sa Zambezi Lawrence Sampofu ubilaezwa kitaba yeswana.
“Batu baluna banwa hahulu tombo. Tombo netisizwe mwasikiliti mo, kono batu seba inwa hahulu. Hamuya kwamutulo wanaha kobanwela
tombo, mukafumana babesa nama. Banwa inze baca, mi habakolwi hahulu. Kono kwanu lubasi kaufela me ni ndate, 06h00 haikwana feela baile zazi ni zai kuyonwa tombo,” nabulezi.
Hana kupilwe kualabela falitaba zeo sibuabui wasipokola Kisco Sitali naize baziba lilata leli tiswa kibucwala, mi kamita haba amuhela lipiho zeo, fokuñwi bakwalanga manwelo asina mapampili. Nabulezi hape kuli buñata bwa malekisezo abucwala mwatolopo ya Katima Mulilo añolisizwe. Hañata butata butiswa kibaba kondola bucwala mwamalapa abona. Kacwalo nakupile baeteleli basizo kutusa nikubona kuli batu bakwala kanako, mi babaoba mulao babihiwe. “Luziba kuli kuna ni butata lukupa baeteleli basizo kubiha litaba zeo, manwelo ao hana kamaiso, aeziwa feela mwamandu abona ili taba yetisa butata mwamahae,” nekubulezi Sitali.