Ngaashi naana kwa didilikwa kutya ounamapya owa fimana moshilongo, kansela woshikandjohoololo shaNdobe Helaria Ndjuluwa ota hokolola ta ti ota ka ninga oshikunino shakula shokulonga olwishi.
Kansela okwa ti oshikunino eshi otashi ka ningwa momukunda Okauva uli moshikandjohoololo shaNdobe, notashi ka kala sha nuninwa ovanyasha aveshe opo va kale tava longo moshikunino.
Meenghundafana a ninga naKundana Ndjuluwa okwa hokolola ta ti elalakano lokuninga oshikunino eshi okulwifa ondjala moshilongo, nokuxwaxwameka ovanyasha opo va kale vena ohokwe yokulonga nounamapya.
Okwa yelifa ta ti ombelewa yaye otai lalakanene oku yandja omayakulo kovanyasha opo va kale tava longo oikulya yavo vo vene tashi pitile mounamapya.
“Oshikunino eshi sholwishi otashi kala shakula moshitukulwa shaHangwena shaashi otwa faneka opo shi kale shili pamufika woshinanena. Onghee ovanyasha vahapu vomoshitukulwa shaHangwena otava kala va mona omauwa ngaashi eemhito doilonga okudilila moshikunino eshi,” Ndjuluwa ta ti.
Onghee hano Ndjuluwa ota kunghulile ovanyasha opo va kale tava longo nondjungu nelitulemo pefimbo eshi tava ka tameka noilonga yavo yomoshikunino. Kansela okwa ti ova pewa nale onhele yedu ya kula apa tava ka ninga oshikunino sholwishi, onghee mopaife otava ka tameka ashike nokuninga omalongekido okukalanda oilongifo ei yapumbiwa okulongifwa moshikunino.
“Otwa ninga nale omaindilo komahangano, ovanangeshefa opo va yambidide oshikunino shetu. Onghee hano ngeenge opena omunhu ena ehalo opo etu waimine mokuyambidida oshikunino eshi shovanyasha okwa manguluka opo a kale akwatafana nombelewa yetu,” Ndjuluwa ta ti. Kansela okwa ti ovanyasha vomoshikandjohoololo shaye vena oikunino na va kale tava kwatafana nombelewa yaye ngeenge va pumbwa okuyanbididwa kombinga yoikunino yavo opo ombelewa ikale ya tula po omalongekido nghee vena okukala vakwafelwa.
Okwa ti oshiwana nashi kale tashi yambididafana nokukala tashi longele kumwe shaashi eshi osho omukalo muwa wokukondjifa oluhepo.
“Ohandi kunghulile opo ovanhu va kale tava kunu omiti doikulya ngaashi omakwaava, omapapaye, nomamengo momaumbo avo opo va kale tava landifa oikunomwa yavo, vo va mone oshimaliwa shokulikwafela,” Ndjuluwa ta ti. Okwa weda po ta ti ovanyasha na va kale tava longifa ounongo wavo wokeenyala opo va kale tava eta posha shipondola ngaashi okutunga oimbale, nomaanda nosho tuu.
“Natulongeni kumwe opo tukondjife ondjala noluhepo mokati ketu,” Ndjuluwa ta ti.