New Era Newspaper

New Era Epaper
Icon Collap
...
Home / MTC otaka shonopaleka omikweyo komashango guukalata

MTC otaka shonopaleka omikweyo komashango guukalata

2023-01-20  Victoria Kaapanda

MTC otaka shonopaleka omikweyo komashango guukalata

 Ehangano lyokwaandjaneka omawi mombepo (MTC) olya ti ita li vulu okuya po nomukalo gopautekinika, okukwathela okushangitha uukalata woongodhi komadhina gooyene, oshoka ohashi pula omanyala.

Omugandji gomauyelele mehangano lyo-MTC Erasmus Nekundi okwa ti, nonando shoka itashi vulu okuningwa, otaya ka shonopaleka omikweyo omileeleka, ndhoka tadhi nyenyetwa koshigwana.

“Otatu ka tuma aaniilonga pamwe natse mboka taya ka enda niitopolwa ya yooloka okugandja omalongo oshowo omatompelo gokushangitha uukalata woongodhi dhawo komadhina oshowo oku ya shanga ethimbo olyo tuu ndyoka,” ta ti ngaaka.

Ta gwedhwa po ta ti, shoka otashi ka yambidhidha wo, itayi yawo moshilongo yi longe nuupu.

Ta ti, iitayi oyi na wo natango iinakugwanithwa yilwe, ihe natango otayi yambidhidha okushangitha uukalata woshigwana.

Oshigwana okuza omumvo gwa yi osha kala nokunyenyeta omikweyo ndhoka omileeleka.

Maria Shikongo ngoka a li e li momukweyo goku ka shangitha okakalata ke mOshakati okwa ti oye na ohokwe nehalo lyokushangitha uukalata wawo ihe omikweyo omile noonkondo unene.

“Ohatu kala tu na iinakugwanithwa yilwe, ihe mpaka ngele owe ya po ito zi po we mbala. Aaniilonga nayo otaya ende kashona,” ta nyenyeta ngaaka.

Omulumentu ngoka naye kwa li e li momukweyo moka, okwa nyenyeta ethimbo a kala po, ta ti omukweyo otagu ende kashona.

“Onde ya po nale po11h00, ihe paife o13h00. Tse yamwe otwi iyaka ko kiilonga, oto mono ashike ombali ya dhenga inaatu yakulwa,” ta ti ngaaka.

Kundana sho kwa li a ningi omapekaapeko, omikweyo ndhoka omile noonkondo noyendji ohaya shuna inaaya yakulwa sho ya sholola, omolwiinakugwanithwa yilwe.

MTC okwa eta po omukalo gokushangitha uukalata woonomola komadhina gooyene omumvo gwa zi ko muJuni. Omukuluntu gwehangano lyo-MTC Tim Ekandjo okwa ti omayishangitho ngoka otaga yi sigo onuumvo muDesemba.

“Shika otatu shi ningi omolwomakengelelo gaafuthi uuna taya longitha omukalo gopangodhi okuyuga oshigwana iimaliwa nosho tuu,” ta fatulula ngaaka.

Ekandjo ta ti, ota indile oshigwana opo shi longithe ethimbo ndika, okunyolitha uukalata wawo, opo kehe gumwe a kale e na okakalata ke na omaukwatya ge.

Okwa tengenekwa ookasitoma dhehangano ndika lyo-MTC dhi vule poomilliona mbali dhi kale dha ishangitha. “Otwa longekidha ethimbo ndika tango lyi longithwe omanga ndyoka tali ka dhengela inaali thikana mu, kehulilo lyomumvo nguka,” ta popi ngaaka. 

Ekandjo ta ti, omayishangitho oge li momahala ga-MTC oshilongo ashihe, miitopolwa ayihe 14.

Omayishangitho ngoka otaga ningwa oshali itaapa pulwa nando ondando yoshimaliwa. Ta gwedha po kutya natango otaga ka kala momahala gomauliko giipindi ga yooloka, taga ka holoka. 

“Kehe ngoka taka thika, na kale a faalela ongodhi ye yopeke, okamutse koshilongo, ombaapila tayi ulike mpoka ho zi lela oshowo ombaapila okuza kopolisi tayi kwashilipaleke kutya okakalata hoka okoye,” ta fatulula ngaaka.

vkaapanda@nepc.com.na


2023-01-20  Victoria Kaapanda

Share on social media