• September 23rd, 2019

Mukwaezi utamelwa kukenisa banana isi kamulao


WINDOKO – Mukwaezi wa limbayambaya zetuna ili walilimo zemashumi amalalu kazesilezi nabonahalile mwakhuta yamuatuli yomunyinyani mwa Katima Mulilo viki yefelile, kakukulubelwa kuli nabata kukenisa banana bababeli kuzwelela kwanaha ya DRC mwanaha isi kamulao. Banana kimusizana walilimo zelishumi kazetalu ni mushimani walilimo zelishumi kazesilezi. Yakulubelwa nazibahalizwe kuba Chris Mujani.

Nahanezwi kulifa masheleñi akulibelela muzeko wahae kwande mi muzeko wahae noisizwe la 10 Yenda. Sibuabui wasipokola Edwin Kanguatjivi naize mukwaezi naswelwi kwamuseto wa Wenela Lamukibelo viki yefelile.  Nabulezi hape kuli banana sebali mwapabalelo yamapokola kwandu yesilelelizwe. New Era nelemuhile kuli banana neli kuli bayo siiwa kwa kambe yababalehi ya Osire kono nekufumanehile kuli hakuna yabaziba kapa yebaziba kwateñi. Mwalipiho zeñwi mapokola mwasikiliti sa Zambezi nebasweli mazwahule ba 135 mi ba 128 neli banaha Zambia mi basupile banaha Congo, mi nebaswalezwi milatu yeshelana. Naize bayahi banaha Congo nebakupile kuina mwanaha mi basaliteñi. Haneli bayahi banaha Zambia bane bakeni isi kamulao baka kutiswa, kono bane bafumanezwi milatu yecwale ka kulekisa lino zehanisizwe bakazekiswa pili basikakutiswa kale.


Selma Ikela
2019-09-02 08:17:16 21 days ago

Be the first to post a comment...