OMUTHIYA – Omupedupresidente wongudu yoSwapo Netumbo Nandi-Ndaitwah okwa pula oilyongudu yoSwapo opo i longele kumwe nokukala i li moukumwe.
Okwa ti osha fimana ngeenge ovanhu ve na oukumwe opo va dule okuyambula po ongudu yoo i dule okufindana momahoololo.
Nandi-Ndaitwah edi okwe di popya koshiongalele shoSwapo sha li kOmuthiya mexuliloshivike.
Nandi-Ndaitwah otaka fikama ongomuulikwapresidente woSwapo momahoololo woupresidente momudo 2024, nokwe lipyakidila nokuninga oikonga moitukulwa ya yooloka nelalakano lokuxwaxwameka oshiwana shi hoolole ongudu yoSwapo novawiliki vayo.
Omuulikwapresidente okwa kumaida oshiwana opo shiha pukifwe keengudu dimwe dopapolitika ndele shi kale shi na elinekelo la pama moSwapo.
Nandi-Ndaitwah okwa kumaida yoo vali oshiwana opo shi xulife po onghalo youkwamuhoko molwaashi otashi teya po oshilongo.
“Kaleni mu lihole, mu na elongelokumwe. Atu sheni Ovanamibia nonande hatu di moitukulwa ya yooloka. Onghee onghalo youkwamuhoko kai na apa tai tu twala,” ta ti.
Onghee okwa ti ngeenge ovanhu itava longele kumwe otashi eta ongudu yoSwapo i teke po.
Okwa ti ovawiliki voSwapo nava kale tava i moshiwana opo va ka pwiikine omanyenyeto oshiwana molwaashi oshiwana osho hashi va hoolola okuya koipundi.
Lwopokati opo, Nandi-Ndaitwah okwa lombwela ovakalimo vomoshitukulwa shaShikoto ta ti epangelo ole lipyakidila okukala la kandula po eshongo lomeva neepate momikunda.
“Ondi shi shi kutya koikandjohoololo ngaashi Okankolo, Eengodi naNehale lyaMpingana omu na oshiwana tashi dengwa kenota. Onghee oshi li elalakano letu lotete okuyandjeneka omeva koshiwana molwashi omeva okwa fimana,” ta ti. – fhamalwa@nepc.com.ma