Victoria Kaapanda
ONGWEDIVA – Okapuka otaka hanagula omapya momikunda dhimwepo moshikandjohogololo shOshakati shokuuzilo. Ndhoka odha popiwa kukansela Abner Shikongo ongula yEtitano.
Shikongo okwa ti okapuka otaka li iilya omukunda Oshandumbala oshowo Ompundja.
“Aanafalama oya dhengwa pomutima, oshoka omapya gawo oga lika shi nanyaleka, shoka tashi yemateke. Okwa li ya inekela okumona iilya nuumvo oshoka omvula ya zi ko inaya mona iilya ya gwana omolwa oshikukuta sha li ko,” Shikongo a popi ngaaka.
Shikongo ta ti okapuka hoka oka nika oshiponga ko ohaka li oshilya taka endelele unene ethimbo lyuusiku shi vulithe ethimbo lyomutenya. Okapuka hoka ohaka kala unene momapya ngoka ge na iilya iitalala noha ka li ashike komitse hoka ku na iilya.
Ta ti okapuka kake li moshitopolwa ashihe, ihe mpoka ke li oke li po lela okendji. Aanafaalama otaya galikana opo omvula yi loke neyinekelo kutya pamwe taka hiti mevi oshoka ngele ka hiti nena oka ya.
Ta hokolola ta ti, sho kwa li a ningi omapekaapeko nkene ye na okudhipaga nenge nkene ye na okuhulitha po okapuka kuumimnisteli wuunampya, okwa ti oye mu yamukula kutya kape na omuti nenge sha hashi longithwa okudhipaga okapuka, onkene aanafalama naya likole ashike.
“Aanafalama oya itula mo shili, yo oye na oonkondo oshoka kehe ethimbo otaya likola ashike, nonande oke li mo okendji momapya. Ondi wete kutya okapuka oka zi momwiidhi ogundjigundji ngoka gwa dhingoloka omapya. Maria Nelenge gwomomukunda Oshandumbala okwa ti okapuka mepya lyawo oka ninga mo oshiwike paife, ashike oka lya no ke ya thiga pomutenya.
“Nonande okwa li tu na omukumo kutya nuumvo otatu mono iilya iihwepo oshoka otwa longele nomvula oya loka nawa, shika she tu teya nduno omukumo. Oomwenyo dhetu odha tunda nonande a tulikola ngaa mboka tu wete po oshoka ohawu hiti kohi yomafo,”Nelenge ta ti ngaaka.
Ta ti ayihe oye yi tula miikaha yaKalunga, ya tale kutya otaya thigilwa po shike.
Okapuka otaku popiwa taka tyakaleke mOshandumbala nOmpundja