Omukulunhuwiliki womakonakono mouministeli wehongo Clemmentine Tsumis-Garises okwa kunghilila ovahongifikola opo ve likaleke kokule nokuvakela ovanafikola omapulo omakonakono shaashi okuvaka omakonakono oshimbuluma sha kula.

Okwa ti osha nyika oshiponga ngeenge omunhu a vaka omakonakono shaashi eshi ohashi eta opo omunhu a kale a kwatwa po.

Okwa ti unene tuu pefimbo e li ovanafikola veendodo dopombada tava shange omakonakono a xuuninwa ovahongifikola nave liufe komilandu odo da tulwa po ngeenge tava talele omakonakono.

Meenghundafana a ninga naKundana Garises okwa ti ngeenge ovahongifikola noshoyo ovakulunhu womakonakono peefikola nokomandiki haku shangelwa omakonakono ova kala tave liufa komilandu da tulwa po onghee eshi otashi keelele omakonakono aha vakwe vali.

“Omudo wa dja ko eshi kwa li twa kundaneka oshikumungu shomakonakono a vakwa otwa yandja omadeulo neudo kovahongifikola, ovakulunhu womakonakono peefikola noshoyo ovahongifikola hava longo komandiki a yooloka opo va kale ve na owino yokuungaunga nomakonakono,” Garises ta ti.

Okwa yelifa ta ti ku keshe omunhu ta ka monika tava kele ovanafikola omakonakono ota kala a pewa e handukilo lopaveta shaashi ouministeli wehongo ina u pitika ovanafikola va kale tava pewa omapulo nomanyamukulo omakonakono tete manga ina va shanga.

Okwa kumaida ovahongifikola opo va kale tava yandje tete ehongo kovanafikola kombinga nghee ve na oku li umbata ngeenge tava shange omakonakono.

“Ouyelele u li kombinga youmbudi womakonakono nau kale wa lopotwa pefimbo,” ta ti.

Okwa weda po ta ti ovanafikola ova pitikwa ashike oku ya mongulo yomakonakono oikwaififo oyo ya pitikilwa mo noi ha dulu okulongifwa ngeenge omunhu ta shange omakonakono. fhamlwa@nepc.com.na