ONANKE- Mwene gwomukunda gwaNanke Nikanor Paulus okwa hokolola kutya okwa limbililwa kiipotha yomadhengathano noshowo omatukathano momukunda gwe mbyoka hayi etithwa unene kiikolitha.
Okwa ti kutya nuumvo ashike iipotha yomatukathano mbyoka ya undulilwa kombelewa opo yi ka tokolwe shi ikololela kooveta dhopamuthigululwakalo oyi li nale itatu. Okwa ti iipotha mbyoka inayi kwatela mo mbyoka ya kundathanwa sho oonakuningilwa omuyonena noshowo oonakuninga omuyonena ya ithanwa ee taya hokololelwa nkene sha simana okudhiminathanapo noshowo okusimanekathana ngele tashi ya pokutukathana.
Okwa ti shika unene ohashi etithwa ngele aantu ya longo ootendela ee taya futwa oshimaliwa koomuma nena mboka ohaya yi nduno koondingosho ee taya ka nwa iikolitha sha pitilila shoka hashi eta omashongathano sigo opomatukano. “Ashike omanga aalongi yomiyonena inaya ya ponkatu yokutokolelwa omageelo gawo, ohatu vihi iipotha mbyoka ee tatu ningi onkambadhala okupopya nawyo. Ngele oshipotha oshinene unene nena ohatu shi undulile nduno komalenga ngoka omanene kutse ngoka ge li kombelewa yoshilongo opo ya vule okugandja omageelo nokutokola ngoka e na ondjo naangoka ke yi na,” osho Paulus a hokolola ngaaka.
Paulus ngoka a li ta popi naKundana mOlyomakaya ga ziko okwa hokolola kutya omalovu ogo uupyakadhi ngele tashi ya mokati kaakwashigwana nota indile ooyene yoondingosho ya iyuthe koompango dhomalovu omalulu.