Festus Hamalwa
Omukainhu weedula 27 ha longo mondingosho okwa fya eshi va ti a tuwa neembele kokamatyona keedula 18 pefimbo kwa li tava tanguna. Oshainingwanima osha ningwa mexuliloshivike momukunda Oshaampula moshitukulwa shaShikoto.
Nakufya okwa tongolwa oye Raina Shihepo omukalimo womukunda Oshaampula. Omupopiliko wopolifi moshitukulwa shaShikoto Inspector Ellen Nehale okwa hokolola ta ti omufekelwa li a kolwa pefimbo loshiningwanima.
Opolifi oya ti omufekelwa okwa pula Shihepo kutya omolwashike iha landele mo ovalandi vaye ngeenge va landa nawa mondingosho yaye.Nokudja opo ova tameka okutanguna. Eshi osha eta olwoodi pokati kavo. Ota ku hokololwa kutya pefimbo lolwoodi, omufekelwa okwa kufa mo ombele yokapi nokutwa Shihepo lwoikando ya yooloka. Opo a xulifila ponhele opo. Omufekelwa okwa kwatwa nota holoka momhangu nena omo ta pangulilwa oshibofa shedipao.
Opolifi oya kumaida oshiwana opo shi xulife po okuumbata oilwifo ngaashi eembele, omakatana neendjebo ngeenge tashi i keendingosho molwashi osha nyika oshiponga ngeenge omunhu a kolwa e na oshilwifo.
Opolifi oya weda po tai ti oshiwana nashi shi li kaleke kokule nokutanguna novanhu va kolwa. – fhamalwa@nepc.com.na