Omukainhu weedula 22 a hangika e na eteelelo leemwedi hamano okwe likufa omwenyo.
Oshiningwanima eshi osha ningwa Etitatu molukanda Goreangab moWindhoek efimbo lokonguloshi.
Nakufya okwa tongolwa oye Kulya Maria Ndatala Taati omukalimo womolukanda laGoreangab. Omupopiliko wopolifi moshitukulwa shaKhomas Warrant Silas Shipandeni okwa hokolola ta ti omukainhu okwe lituwa a fya e li meemhango komulumenhu waye pefimbo kwa li e ke mu talela po kobashu yaye.
Opolifi oya hokolola tai vati Taati ina kala ta ulike e na omadidiliko okulikufa omwenyo.
Vati ina fiya po omukanda tau yandje ouyelele kombinga yefyo laye onghee omakonakono opolifi otaa twikile. Kape na omunhu a kwatwa po mekwatafano lefyo laye fiyo opapa.
Opolifi onghee tai twikile oku kunghilila oshiwana opo shi kale tashi ka konga omakwafo kovaxungimwenyo, ovafitaongalo ile kovakwapata vavo ngeenge tava hepekwa koupyakadi wopamadilaadilo shaashi okulikufa omwenyo kaku shi ekandulepo lomukundu.
Eshi a kwatafana naKundana omuxungimwenyo moshipangelo shaShakati, Tuwilika Kalunduka okwa ti ovakainhu vamwe ngeenge ve na omateelelo ohava kala va kwatwa koshenyenhu ngeenge vehe liudite novalumnehu vavo. “Ovakainhu vamwe ohava kwatwa komhepo yokulikufa omwenyo ngeenge ve na omateelelo ehe na oovene, mwa kwatelwa okulikalwa kovalumenhu. Ovakainhu vamwe ohava kala ve na oupyakadi woudu ile tava hepekwa koluhepo eshi ihava pewa sha kovalumenhu vavo,” Kalunduka ta fatulula.
Onghee okwa ti naashi ohashi eta opo ovakainhu va kwatwe komhepo yokulikufa omwenyo shaashi ohava kala va luliwa koshinyenu.
Kalunduka okwa kunghilila ovakainhu ve li momateelelo opo va kale tave ka konga omakwafo koipangelo kovaxungimwenyo.