Opolifi moshitukulwa Erongo otai konakona oshibofa shomukulupe weedula 82 ou va ti a ponokelwa meumbo laye koolyamupombo vatatu noku faduka po nomaliko aye.
Oshiningwanima eshi osha ningwa oshivike sha djako efimbo lokeengulasha moVineta modoolopa yaSwakopmund.
Omupopiliko wopolifi moshitukulwa Erongo Inspector Ileni Shapumba okwa hokolola ta ti ovafekelwa tete ova teya ekende leumbo noku nhukila meumbo omo.
Va ti nakuninga oshihakanwa okwa ningilwa omatilifo kovafekelwa kutya otave mu dipaa nokonima ove mu manga neengodi komaulu.
Opolifi oya hokolola tai ti ovafekelwa ova kufa mo oilwifo yeendjebo ine ya hangika meumbo lomukulupe noshoyo ongodi yopeke.
Ovafekelwa vati okwa li yoo vali va faduka po notuwa yomukulupe ashike oya ka hangika molukanda DRC konima eshi oshiwana sha longela kumwe nopolifi, ka pena omufekelwa a kwatwa po fiyo opapa.
Opolifi otai indile moshiwana kwau e na ouyelele kombinga yovafekelwa ava opo oshiwana shi kale sha lopotela opolifi keshe i li popepi.
fhamalwa@nepc.com.na