Omulumenhu weedula 38 okwa xulifa vati eshi a nwa ombike ihapu neenghono. 

Oshiningwanima eshi osha ningilwa oshivike shadja ko mofaalama yonhumba koKamanjab. 

Nakufya okwa tongolwa oye Alfons Guruseb omunailonga womofaalama.

Omukonakoni woimbuluma wopolifi moshitukulwa shaKunene omupedu Commissioner Paavo Iiyambo okwa hokolola ta ti Guruseb pamwe nomukainhu waye okwa li va ya kofaalama i li pomudingonoko wavo va kanwa ombike komukwashiwana oo vati a landifile ombike mofaalama.

Onghee okudja opo vati ova tokelwa tava nu ombike fiyo ta kushi.

Opolifi oya ti mongula eshi kwa sha omukainhu ou a landifa ombike okwa va lekela kutya otai kofaalama ikwao ta ka landifa ombike yaye opo ipwe mo.

Vati okudja Guruseb, omukainhu waye novanhu vatatu ovo kwa li tava nu navo ombike ova landula omukainhu oo opo va ka twikile okunwa ombike kofaalama ikwao.

Opolifi oya hokolola tai ti manga ve li mondjila Guruseb okwa lombwela vakwao kutya ye ota sha la po a nangale koshi yomuti shaashi vati okwa li a kolwa nai onghee okwa pumbwa okufuda po.

Okudja opo vakwao pamwe nomukainhu waye ova twikile nolweendo lavo va uka kofaalama ikwao ndele tava tokelwa tava nu ombike oule womafiku availi fiyo Etivali momafiku 02 Novomba.

Opolifi oya ti Etitatu lomafiku 03 Novomba Guruseb okwe li tuwa koshi yomuti opo kwa li a fiwa a fya nolutu laye la ninga nai.

Vati ota ku fekelwa kutya oku na okukala a fya eshi a nwa ombike ihapu onghee omakonakono opolifi otaa twikile.

fhamalwa@nepc.com.na