O m u n a s h i p u n d i w oma l e l o o p a m u f y u u l u l w a k a l o C h i e f Ndilimani Herman Iipumbu okwa koleka ta ti oshimaliwa shongobe pamufyuululwakalo osha wedelwa N$1000 onghee paife ongobe oya ninga N$2500-00.
I i p u m b u o k w a t i o v e t a e i oya totwa po neudo konima eshi omalelo opamufyuululwakalo kwa li a ninga omutumba wa li kombinga yokutula po omilandu dipe momalelo opamufyuululwakalo monooli.
Iipumbu okwa ti oshimaliwa okwa li shi na okukala sha wedelwa momudo 2020 ashike okwa li sha kelekwa manga molwashi kwa li etukuko linene ombuto yoCovid-19.
Meenghundafana a ninga naKundana Etine Iipumbu okwa hokolola ta ti ovanhu nale okwa li hava pulwa va fute N$1500 ngeenge omunhu kena sha ongobe ashike paife otava kala tava fute N$2500 mongobe keshe.
“Oshimaliwa osho otashi kala ashike tashi futwa kovanhu va longa oimbuluma ngaashi okudipaa, omakwatonghonga, okulemaneka omunhu, oumbudi noshoyo tuu. Onghee omunhu ngeenge okwa holoka komhangu yopamufyuululwakalo oha pula a fute eengobe ile oshimaliwa,” Iipumbu ta ti.
Okwa yelife ta ti ovanhu ohava pangululwa shelikwatelela koshibofa shaye shaashi oibofa iha i futwa eengobe ile oshimaliwa shi fike pamwe.
“Omhango ei ipe oya kwatelamo omalelo ayeshe opamufyuululwakalo monooli. Oshiwana nashi kale tashi liufa komhango ya tulwa po pehe na nande oulingilingi tau longifwa,” ta ti.
Okwa hokolola ta ti omulumenhu ngeenge okwa mitike okakadona ndele ota pulwa a fute eengobo nhatu ashike kena sha ota dulu opo a kale a futa oshimaliwa N$7500.
“Omhangu yopamufyuululwakalo iha i yandje elombwelo komunhu opo a fute ongobe oye aike ashike oha shi di ketokolo lomunhu ngeenge ota dulu okumona ongobe ile oshilimaliwa,” ta ti.
Okwa kumaida oshiwana opo shi kale kokule nokulonga oimbuluma nokulikelela okuninga oihakanwa yokufuta eengobe ile oshimaliwa ngeenge tashi holoka keemhangu domufyuululwakalo.
Eshi va kwatafana naKundana ovakwashiwana vamwe ova ti ka shi payuuki eshi ongobe ina oshimaliwa shishona pamufyuululwakalo ashike ngeenge omunhu ta ka landa ongobe ohai kala ina ondilo.
O n g h e e o v a t i o m a l e l o opamufyuululwakalo na kale ashike tava futifa ovanhu eengobe ponhele yoshimaliwa shaashi iha shi kala shiwa ngeenge omunhu ta pewa okamliwa kashona unene tuu moibofa yomadipawo.
fhamalwa@nepc.com.na