Lüderitz – Oshivilo shoipindi shokomudo sha shiivika nedina Oshivilo shOmakolofishi (Crayfish Festival), osha shiivifwa tashi ka kala ko okuhovela 25 – 30 April 2019 modoolopa yokomunghulofuta yoLüderitz. Eshi osha shiivifwa pambelewa mouvalelo weongelo loshimaliwa shokuyambidida oshivilo eshi, sha li moLüderitz Nest Hotel, onguloshi yEtitano la ya.
Oshimaliwa sha konda eemiliona N$2 osha ongelwa onguloshi tuu oyo, omo ehangano lopashiwana lokuyula eeshi Seaflower Group la yandja oshimaliwa shomiliona N$1,5 million, Ombaanga yoStandard Bank nehangano loMTC keshe ehangano ola yandja N$100 000, ehangano lokuyula eeshi loNovaNam ola yandja N$50 000, Namport N$18 000, Marcofishing N$10 000, opo nee omahangano a yooloka, novanhu koohandimwe vaudaneka okuyandja oshimaliwa okudja N$200, fiyo N$5000.
Mouvalelo weongelo loshimaliwa omo tuu omo omwa shiivifwa kaume woshivilo shoCrayfish, Amos Shiyuka, a landula oo ali nale kaume koCrayfish Festival eedula da pita Tim Ekandjo.
Moshipopiwa shaye, Shiyuka okwa udaneka ta ka longa noudiinini opamwe novakalimo vomoLüderitz pakuweda ongushu koshivilo shoipindi shokomudo shoCrayfish Festival. Okwa tumbula kutya, ye opamwe novakalimo vomoLüderitz, otava dulu okuweda ongushu koshivilo shoipindi eshi, pakushiiva ovapambale nookaume moshilongo ashishe, ve uye va kufe ombinga moshivilo eshi shoipindi.
Oshivilo shoCrayfish, oshivilo shoipindi shokomudo hashi kala ko odula keshe moLüderitz okudja eshi sha yeululwa tete modula 2008.Oshivilo shoCrayfish, osha lukilwa oludi loshi oyo i na ondilo, nohai kwatwa ashike nokulongwa modoolopa yokomunghulofuta yoLüderitz.
Minista weeshi needjo domefuta Bernhard Esau, oye ashiivifa pambelewa oshivilo shoipindi yokomudo noneudo oko shi li. Moshipopiwa shaye Esau okwa pupula kombuda eleo lodoolopa yaLüderitz oshoyo ovanageshefa modoolpa eshi ve litulamo moku unganeka oshivilo eshi, tashi ka wanifa eedula 12 odula yoneudo.