WINDHOEK-Ovakwashiwana vomumukunda Okafitu kaKatanyange mOutapi ova ninga ehololomadilaadilo lopambili mEtitano la dja ko kombelewa yomupanguli moshitukulwa nokuyandja omukandanyenyeto wavo omolwa omulumenhu oo a dipaa ovamwainaona vavali ta ehameke neenghono nokukwata inakulu onghonga, tava ti ina pewa nande e lifutile mo.
Omufekelwa omunamido 27 Menas Thomas Hifanye, omulongi woimbuluma mukulu nokwa li ashike opo a yuululwa mo modolongo kefilonghenda pexulilo laJanuali omo a li a ninga eedula 8 omolwa edipao lohonda yaye.
Oshiningwanima omo vati a dipaa ounona ava voumwainaona vavali ta ehameke nokukwata keenghono inakula lwopotundi 00h00 momukunda Okafitu kaKatanyange moshikandjohoololwa shaOutapi, osha kolekwa komupopiliko wopolifi yaMusati Inspector Lineekela Shikongo.
Ouyelele wa yandjwa keedjo ota u ti, omufekelwa ou okwa hangika ashike opo a di mo modolongo oshivike sha dja ko omo a kala omido adhishe hetatu, pefimbo e li twa mu inakulu noumwainaona vavali va li tava i kombaanga kOutapi.
Vati okwe va mona, tava nane oshimaliwa mombaanga noku ka landa ekutu loufila mofitola yonhumba,
“Oufiku omufekelwa okwa ya mondunda omo ava vatatu vali va nangala e na omupini wetemo noshikulumbwati shomusaati osho a longifa okudengaula inakulu noumwaina ava naashi osha eta efyo lounona,” Shikongo ta ti. Ye ta weda po ta ti omufekelwa ou vati okwa twikila nokudenga oshihakanwa shaye osho shi na omwenyo molutu alishe. Omukulupe ou okwa monifwa oshiponga neenghono nokwa tambulilwa moshipangelo shepangelo shopashitukulwa shaUtapi a li e li monghalo ii.
Omufekelwa okwa kwatwa po Etitano loshivike sha dja ko a kwatelwa molukanda lOnhimbu mOutapi omo a li ta li oshimwenyo neefelende daye.
Otaku hokololwa omufekelwa ou e li hokolola yeemwene kutya oye a longa oilonga oyo yoikulumanene ta ti ye okwa li ashike a hala oimaliwa.
Omufekelwa ou okwa li ashike e na eedula 19 eshi a longele oshimbuluma shotete osho sha li sha eta opo a pewe ehandu lomido 20 konima yekumba.
Oonakufya ovo Linus (12) naThomas Ndapuka (8).
Momushangwakemo wa li wa leshwa kuPetrus Daniel nowa tambula ko komupanguli Martha Hasheela, ovanamukunda otava pula opo omupanguli aha yandje nande omhito yokulifutila mo modolongo komulongi woikulumanene, omukwashiwana waAngola oo e li omufekelwa medipao nekwatonghonga.