Omukulunhuwiliki wehongo moshitukulwa shaShikoto Aletta Eises okwa ti Oshikandjohongo shaShivelo oshi na omwaalu muhapu wovanafikola ve na omateelelo. Eises okwa ti ovanafikola ve li 117 ova pewa omateelelo kovalumenhu ovo vahapu vomuvo vehe fi ovanafikolwa, mwa kwatelwa omunafikola umwe a pewa eteelelo komunangeshefa. Edi Eises okwe di popya mexuliloshivike pefimbo lomutumba wounona voumati eshi kwa li tava pewa ehongo nouyelele opo kukelwe vaha longo oimbuluma noshoyo okuli tula mo moilomgwa yavo yofikola.
Eises okwa ti ombelewa yaye ya didilika omwaalu muhapu wovanafikola hava fiye po ofikola ngeenge va ninga omateelelo, omanga ounona voumati va kwatwa komhepo yoku longifa oingangamwifi mwa kwatelwa omalodu. Okwa ti ounona vofikola ovo va ninga omaufimba neudo, ova kwala mo ovanafikola 138 ve li mondodo onhi-8 omanga ovanafikola 118 ve li mondodo onhi-9 ova fiya po ofikola. Omuvalu edi ota di limbilike shaashi okaana ngeenge oka tameka ofikola pefimbo, oke na oku kala keli koshi yomido 15 eshi keli mondodo 9.
“Ovanafikola va fiya po ofikola omwa kwatelwa ovanafikola va ninga omateelelo noshoyo ovo ihava mono etenatelo la wana lovadali vavo,” Eises ta ti.
Onghee okwa ti osha fimana opo ovakulunhu va kale tava popi nounona vavo kombinga yefimano lehongo.
Eises okwa ti ombelewa yaye otai twikile noikuninga oikonga keefikola opo ovanafikola koukadona noumati va kal vae pewa ouyelele nehongo.
Eises okwa yelifa ta ti oshikandjohongo oshivelo osho shimwe shi na omwaalu muhapu wedopo wovanafikopa okufafanifa noikandjohongo ikwao.
“Ovadali navo ove na oshinakuwanifa shokukumaida ounona vavo opo vaha kale vali tava i moixulo vo veli kelele okulongifa oingangamwifi nomalodu manga ve li mofikola,” ta ti.
Okwa weda ko tati ovadali, ovaleli vopamhepo nava longele kumwe novahongifikola opo va kundafane nghee ovanafikola ve na okuyambididwa.
“Natu longeleni kumwe. Ovanafikola ovo ovaleli vokomongula. Onghee osha fimana opo tu twe ovanafikola omukumo va kale mofikola,” ta ti.
– fhamalwa@nepc.com.na