Nonande oshilemo shoshipaxu sha li sha wila moshitukulwa shaMusati nomOhangwena, ovanambelewa vounamapya ova tokola oku shi finda.
Ngoloneya woshitukulwa shaMusati Erginus Endjala okwa ti oshipaxu osho she uya moshitukulwa shaye okudilila kombinga yaHangwena, paife otashi ende tashi lihanene mokati koshitukulwa, sha yuka moiukunda odo di li mokati kOmusati.
“Paife ou wete kutya osha yuka komikunda ngaashi koAnamulenge, Outapi nOgongo. Omikunda odo nadi kale di li oshanda,” Endjala ta ti.
Ashike nonande okuniwe oumbada ngaha, ovanambelewa kouministeli wounamapya onghee tava lwifa oshipaxu, nohava ende va lambalala keshe apa tashi nambele noku shi twimikila.
Meenghundafana a ninga naKundana kansela woshikandjohoololo shaNgenga Mathew Shikongo okwa koleka kutya oshipaxu eshi osha fika momikunda ngaashi Eengava, nOmatangela.
Shikongo okwa ti oshipaxu eshi okwa itavelwa kutya osha tuka okudilila moAngola, nosha nambela tete momukunda Eengava, mOngenga, omo sha fikila sha londa komuti u li mepya limwe.
“Oshi tilifa unene okumona oshipaxu eshi, oshiwana okwa li sha kumwa unene nosha kwatwa koumbada eshi sha mona oshipaxu sha fika momukunda, okwa li shi na oumbada woikunomwa yavo ei i li momapya. Osha tameka tashi kuu mokule, ashike okwa li sha kunghulilwa opo shi ngungumane,” Shikongo ta ti.
Kansela okwa ti oshipaxu eshi osha ningila oikunomwa omunyonena ngaashi momukunda Oshindobe.
Mongaha oshipaxu osha fika moshitukulwa shaMusati momikunda ngaashi Ongolo, Ondudu nOlupito moshikandjohololo shaKalongo. Ashike onghee ngaa tashi pula komesho natango sha uka momikunda di li moshitukulwa shaMusati.
“Ovanambelewa vounamapya ova fika ongula yOsoondaxa ponhele opo pa monika oshipaxu opo va shiive okutwiimika komuti oku oshipaxu sha londa,” Shikongo ta ti.
Okwa ti ovanhu ova hovela okutema oixwa, nokukala tava ninga eweelelo shaashi vati oshipaxu kashi hole eweelelo lihapu.
“Konima eshi ovanhu va tameka oku twiimikila oshipaxu osha tameka okufya omanga shiwe sha faduka po sha uka kouninginino komikunda edi di li keengamba ngaashi Oshindobe nEengwena,” Shikongo ta ti.
Pexulilo kansela okwa kunghulila oshiwana opo shi longelekumwe nouministeli wounamapya opo oshipaxu eshi shi kale sha xulixwa po meendelelo.