Komufala wopolifi moshitukulwa shaShana Commissioner Naftal Lungameni Sakaria okwa pula omalelo eedoolopa opo aa kale taa yambidida opolifi moshitukulwa kombinga yomashongo aa taalelwa kopolifi.
Okwa ti opolifi ohai kala ya taalela omashongo a yooloka onghee osha fimana opo omalelo a kale taa shakeneke oshikondo shopolifi ondjilakati.
Sakaria okwa yelifa ta ti opolifi otai longo noupu ngeenge ina oikwafifo ya wana ngaashi eetuwa, oilongifo yomeembelewa noshoyo omindjalo dovapolifi.
Edi Sakaria okwe dipopya pefimbo a talela po pambelewa elelo lodoolopa yaNdangwa Etitatu eshi kwa li ta topopi kombinga yomashongo a taalelwa kopolifi.
Okwa li a shakeneke omukulunhuwiliki wodoolopa yaNdangwa noshoyo ovanambelewa va yooloka hava longo melelo laNdangwa opo va topolafane ouyelele.
Sakaria okwa ti elalakano letalele po okukalela po yoo vali ekwatafano liwa pokati komalelo eedoolopa nopolifi opo a kale taa longele kumwe mokulwifa oimbuluma.
“Onda hala omahangano a yooloka, omalelo eedoolopa, omalelo opamufyuulukalo noshoyo opo a kale ta longele kumwe nopolifi opo tu dule okulwifa oimbuluma noupu,” Sakaria ta ti.
Okwa weda po ta ti opolifi otai twikile nokaleka po eameno la wana moshitukulwa nokulela oimbuluma.
Sakaria okwa ti ota ka talela po omalelo ayeshe eedoolopa e li moshitukulwa shaShana opo va kaleke po okumwe.
Konima eshi Sakaria a ninga komufala wopolifi mOshana okwa kala nokuninga omitumba novakwashiwana, omalelo opamufyuululwakalo, oovene vomahangano okulela omaliko noshoyo ovakulunhu veembanga opo va kundafane nghee tava ka longela kumwe nokulwifa oimbuluma.
fhamalwa@nepc.com.na