Minista wounamapya, omeva nomatululo omadu Calle Schlettwein okwa kumaida oshiwana opo shi kale tashi kufa ombinga moinyangadalwa younamapya opo shi dule okulonga oikulya yasho vene.
Edi Schlettwein okwe dipopya kefiku ledimbuluko loikulya monyuni la dimbulukiwa koshikandjohoololo Uukwiyuushona moshitukulwa shaShana Olomakaya.
Minista okwa ti osha fimana ngeenge ovanhu tava longo oikulya tashi pitile moikunino yavo opo va dule okulwifa ondjala noluhepo noshoyo okuhambula po eliko loshilongo tashi pitile momangeshefelo ounamapya.
Okwa kunghilila yoo va li ovanafaalama opo va kale tava longo oikulya yoitungifilutu ihapu oyo tai dulu okuliwa moshiwana momidingonoko. Moshipopiwa shaye sha leshwa komukulunhuwiliki mouministeli wounamapya Ndiyakupi Nghituwamata, okwa ti ekandule po londjala, oluhepo nomanyutu osho shimwe shi li oshilalakanenwa shepangelo shotete opo ku kwashipalekwe kutya ka pena Omunamibia ta fi kondjla ile ta kwatwa komanyutu. “Epengelo ola tot apo eepolongalama dihapu lokuyambidida oshiwana shi li momhumbwe yoikulya noshoyo okuyandja omakwafo kovanafaalama ve na oikunino,” minista ta ti.
Okwa weda po ta ti okuyandjaneka omeva moshiwana osha fimana kovanhu ve na oikunino opo va kale tava longifa omeva okutekela oikunonwa yavo nokunwefa oimuna.
Okwa kunghilila ovanafaalama va kula opo va kale tava yambidida ovanafaalama va shona opo va dule navo okulonga oikulya ihapu noshoyo okuhambula po oikunino yavo i dule okuxuma komesho. Mefiku tuu olo, minista pamwe novanambelewa va yooloka mwakwatelwa ngoloneya waShana ova yandje oikulya noimeno komaumbo atatu oo e na ovanhu ve li momhumbwe yoikulya.
Ouministeli wounamapya owa yandja yoo vali oikulya kombelewa yangoloneya waShana opo i katopolelwe ovanhu 15 keshe moshikandjohoololo shi li mOshana.
Ovanhu tava ka pewa oikulya ova va ashike va didilikwa ve li momhumbwe yoikulya.
Efiku loikulya mounyuni ola danwa koshi yoshipalanyole “Kape na omunhu ta klala po ngeenge tashi ya mokulonga oikulya, ovanhu nava longe oikulya yoitungifilutu ihapu nokukala va a mena omidingonoko davo.”
Efiku e li oha li danwa a lushe mounyuni momafiku 16 Okotoba nelalakano lokutwa ovanhu omukumo opo va kale ve na ohokwe yokukufa ombinga mokulonga oikulya noshoyo okukala va pewa ouyelele kombinga yefimano lounamapya mounyuni.