Omulumenhu weedula 29 okwa fiwa pomutenya komukainhu waye oo vati a xwika po omaufemba aye, oikutu noshoyo okambwa komeumbo.
Oshiningwanima osha ningwa momafiku 5 Sepetemba pobashu yavo kOgongo moshitukulwa shaMusati.
Maritinus Kahambulwa okwa hokolola ta ti okwa kala nokudengwa shito komukainhu waye noshoyo okuningilwa omatilifo edipao.
Onghee okwa ti paife okwa tembuka mo mobashu yavo shaashi okwa tila okudipawa.
“Omukainhu wange oha ende e kwete ombele ta kongo nge a hala okutwa nge,” ta ti.
Okwa lombwela Kundana ta ti opolifi vati oya anya a patululile omukainhu waye oshibofa.
“Ovapolifi ova ti ondi mu vaya onghee onda shuna keumbo,” Kaahambulwa ta ti.
Kundana okwa ninga eenghendabala dokukwatafana nomukainhu oo lwoikando ya yooloka ashike ongodi yaye oya dima.
Omupopiliko wopolifi moshitukulwa shaMusati Inspector Anna Kunga okwa ti osha puka eshi ovapolifi va anyena Kahambulwa a patulule oshibofa.
Kunga okwa ti omunhu keshe oku na oufemba wokupatulula oshibofa pehe na omangabeko ile omatilifo.
Onghee okwa ti ota kwatafana nombelewa yakakukutu wopolifi mOmusati opo Kahambulwa a kale a kwafelwa.
“Osha nyika oshiponga ngeenge omunhu ta ningilwa omatilifo edipao shaashi otashi dulu okueta ovanhu ve lidipaye,” Kunga ta ti.
Okwa weda po ta ti ovalumenhu vahapu ova ninga oihakanwa yokuhepekwa kovakainhu vavo ashike ohava kala va mwena ngeenge tava ningilwa omatilifo.
Onghee okwa kumaida ovalumenhu opo alushe va kale va manguluka okulopotela opolifi ngeenge tava ningilwa omatilifo kovakainhu vavo.
“Ovanhu nava kale tava lopotele eembelewa dovakulunhu wopolifi poitaashi yopolifi ngeenge itava ya kulwa nawa,” a weda po.