Epangelo laJapan melongelokumwe nongonga hangano mounyuni yoWolrd Food Organisation oya yandja oukalata koshiwana shi li momhumbwe yoikulya opo shi kale tashi longifa okulanda oikulya meefikola. Oukalata ova yandjwa Etivali moshikandjohoololo shaTsintsabis moshitukulwa shaShikoto. Keshe kamwe oke na ongushu yoshimaliwa N$850.
Ovanhu va pewa oukalata ova dja moitukulwa ngaashi Oshikoto, Omaheke noKunene.
Ovanhu ve dulife 21 000 mwa kwatelwa ounona 3700 ve li koshi yeedula nhano ve na omanyutu otava ka va pewa oukalata vokulanda oikulya okudja moitukulwa itatu oyo ta tofwa mo.
Moshipopiwa shaye kansela woshikandjohoololo shaTsintsabis Elia Marthinus okwa ti moshikandjohoololo shaye osho shimwe shina oshiwana shihapu shovayelele tashi dengwa kondjala noshoyo ovanhu vahapu ve li moluhepo.
Onghee okwa pandula eshi epangelo laJapan la yambidida oshiwana noikulya shaashi oikulya oya pumbiwa kovanhu.
Okwa kumaida ovanhu va pewa oukalata opo ve va longife nelalakano lokulanda oikulya yomaumbo avo noshoyo oku li ka leka kokule nokulandifa po oikulya oyo tava ka landa.
Moshipopiwa shaye omukaleliposhilongo a dja koWorld Food Organisation Dr George Fedha okwa ti osha fimana ngeenge ovanhu ve na oikulya momaumbo opo ku kelelwe ovanhu vaha fya kondjala noshoyo okukwatwa komanyutu.
Okwa weda po yoo vali ta ti ombelewa yavo otai lalakanene okushakeneka epangelo laNamibia ondjilakati tashi pitile mokulwifwa ondjala moshilongo.
fhamalwa@nepc.com.na