Auleria Wakudumo

Omupresidente Netumbo Nandi-Ndaitwah otaka kalela po oshilongo komutumba woilongo ya hangana yaAfrica, hano oAfrican Union (UN) uti-39 oo tau ka kala ko moAddis Ababa shaEthiopia. 

Omutumba woilongo yaAfrica otau ka kala ko oule womafiku avali, okudja mo14 fiyo 15 Febuluali 2026. Omutumba ou otau ka kalelwa po komitwe doilongo yaAfrica da yooloka osho yo epangelo loAfrican Union. 

Omupresidente okwa teelelwa a kale a fiya po oshilongo mo 12 Febuluali nota ka aluka mo16 Febuluali. 

Omutumba ou owa landula omutumba wovakulunhu voitukulwa oo wa li ko okudja momafiku 11 fiyo 12 Febuluali. 

Omitwe doilongo yaAfrica oda teelelwa di ka kundafane omashongo a taalelwa kuAfrica ngaashi ombili neameno, oidjemo yomutumba wodula ya dja ko yomutumba, okukundafana exumokomesho lomhangela yo2063, etalululo loinima imwe oyo i li moAfrican Union osho yo okutalulula oinima imwe momutumba woiwana ya hangana naikwao imwe. 

Omutumba otau ka patulula yo pambelelwa oshipalanyole shoAfrican Union 2026. Neudo oiwana yaAfrica ya hangana otai ka wilikwa koshipalanyole tashi ti: okukwashilipaleka oshiwana oshi na omeva a yela osho yo oundjuwo okuhanga elalakano lo2030. 

Oshipalanyole shoneudo otashi holola efimano lokuandjaneka omeva, oundjuwo vongushu moshiwana, exumokomesho osho yo elunduluko longhalo yomhepo muAfrica. 

Otali tu yo kumwe nelalakano laNamibia olo hali ifanwa kutya oVision 2030 osho yo omhangela itihamano yoNational Development (NDP6). Etulo moilonga yalo ola teelelwa li ka kandule po oupyakadi unene meenhele omo muhe na omeva ile oundjuwo. 

Omutumba otau ka tula moilonga omhangela yo2063. Oinima tai ka kundafanwa ongaashi etulepo leendjebo, ombili nelandulefano osho yo eyambulepo nexumokomesho laAfrica. 

Omupresidente ota ka longifa yo omhito ei opo a nghonopaleke ekwatafano pokati koshilongo noilongo ikwao. Namibia nande e na nale ekwatafano liwa noilongo yomuAfrica ihapu, natango okwa hala okuwedela ko kekwatafano eli osho yo okuya meenghundafana noikondo yexumokomesho nomahangano okondje yoshilongo. 

Omutumba otau ka nghonopaleka yo exumokomesho laNamibia, elandifo kondje yoshilongo oshoyo okuninga omapungulo kondje yoshilongo. 

Omakwatafano a kolekwa kombelelwa yomupresidente ongaashi ekwatafano pokati komunashipundi woAfrican Union Commission. Eshi oshili oshikando shotete omupresidente ta ka ya mekwatafano naye. 

Mekwatafano yo nomukulunhuwiliki wehangano lokuandja oshimaliwa shonghaloyomhepo hali ifanwa oGreen Climate Fund Mafaida Duarte osho yo Omuprima Mmiso Dlamini wouhamba waEswatini. 

-awakudumo@nepc.com.na