Kakukutu kopolifi Inspector General Joseph Shikongo okwa ti opolifi otai twikile okukaleka po ekwatafano liwa novanafaalama nelalakano lokukandeka oumbudi woimuna meefaalama. 

“Ovanafaalama nava kale ve na eenomola dopolifi efimbo keshe opo va dule okulopota ookalyamupombo tava ponokele eefaalama davo,” ta ti. Edi Shikongo okwe di popya oshivike sha dja ko pefimbo kwa li a ninga omutumba novanafaalama kodoolopa Aminuis. Ovanafaalama okwa li va holoka momwaalu muhapu okutopolelafana omayele nopolifi nghene ve na okulwifa oimbuluma youmbudi woimuna. Omutumba ou okwa li wa fimana molwaashi ovanafaalama okwa li va mona omhito yokupula opolifi omapulo nokupewa omanyamukulo. Shikongo okwe lipyakidila nokuningaomitumbanovanafaalamakoitukulwa ya yooloka nalalakano lokukundafana nghene oimbuluma tai kandekwa keefaalama. 

Okwa popya ta ti okwa didilikwa oumbudi woimuna wa londa pombada moitukulwa ya yooloka moshilongo, unene woikombo neengobe. “Ovanhu otava vake po oimuna yavakwao ndele tava ka landifa ile va ka landife okapana,” ta ti. Okwa ti ovanailonga vamwe vokeefaalama ohava longele kumwe novanhu hava landifa oupana. Pefimbo lomutumba ovanafaalama ova lombwela opolifi tava ti ova taalela omashongo oimuna tai vakwa po osho yo eemboola domeva tadi tewa po kookalyamupombo. 

Okwa nyamukula ta ti ombelewa yaye otai ka kwashipaleka kutya oimuna yovanafaalama oi li meameno tashi pitile mokukwata po ookalyamupombo. “Onda didilika omashongo a taalelwa kovanafaalama. Ohatu ka longela kumwe navo opo tu kandeke oimbuluma keefaalama,” ta ti. 

Okwa yelifa ta ti oimuna oya fimana koshiwana molwaashi ohai lwifa ondjala noluhepo nosho yo okuyambula po eliko loshilongo. “Kaleni mu na oukumwe noushiinda uwa. Ngeenge omwa mono mofaalama yamukweni t mu shingwa oshimuna lopotela opolifi diva,” ta ti. 

-fhamalwa@nepc.com.na