ETUNDA – Osikola ndjoka tayi tungwa kofaalama yomukokolipresident Sam Nujoma otayi pu okutungwa momasiku omashona komeho sho ya yambidhidhwa noshimaliwa N$150 000. 

Oshimaliwa shoka osha zi kehangano lyoRani, opo shi longithwe okumana shoka shi li kosikola ndjoka yi pwe okutungwa. 

Omukuluntuwiliki gwehangano lyoRani, Ali Dharani okwa ti oya kala nokugandja omayambidhidho ga yooloka okuza 2013 okuhumitha komeho osikola Etunda Primary. “Otwa yambidhidha noshimaliwa shoka opo osikola ndjoka yi pwe okutungwa , oshowo omihandjo dhi vule okweedhilila aalongwa haya zi kokule nosikola,” ta fatulula ngaaka 

Dharani okwa popi ta ti, kehe okanona Okanamibia oka pumbwa okumona eyilongo lya kola opo ka vule okulongekidha onakuyiwa yako. 

Ta ti, elalakano lyawo okuyambidhidha oshigwana shaNamibia, shi ze ponkatu mpoka shi li opo shi ye ponkatu yimwe okweendela pamwe naantu aye-he. 

“Otwa hala aalongwa ya mone eyilongo lya pumbiwa opo ya ka kale aantu ya pumbiwa monakuyiwa, opo oshilongo kaashi ka konge oonkulungu dhimwe kondje yiilongo. Pamukalo ngoka oshimaliwa otashi kalekwa moshilongo,” ta fatulula ngaaka. 

Dharani esiku ndyoka okwa ti, oye li ponkatu mpoka ye li nena omolweyambidhidho lyoshigwana, onkene otaya tsikile okugandja moshigwana, unene mboka ye li lela mompumbwe yokuyambidhidhwa. Aalongi naalongwa posikola Etunda Primary oya pandula nokutumbaleka ehangano lyoRani, omolwiilonga ya kala nokulongela oshigwana shaNamibia. “Ohashi pula omadhiladhilo gongushu oshowo oonkondo opo gumwe a longe ngaashi ehangano ndika lyoRani lya ningi notali tsikile okuninga,” ya popi ngaaka. Omumvo gwa zi ko moshitoplwa shaShana omwa patuluka osikola yookompiyuta ndjoka ya li ya tungwa neyambidhidho loshimaliwa shi thike, poomilliona N$1.6 okuza natango kehangano lyoRani. 

Natango ehangano olyo tuu ndika lyoRani, olya kala nokuyambidhidha aanuulema nuutemba oshilongo ashihe. 

Ayihe mbyoka Rani okwa yeitha kutya okwe yi ningi omolwolukeno e na noshigwana. –vkaapanda@nepc.com.na