!GOMENǁGAMS – Daogu !Khōdanas ǂGaes (RFA)  ge -ǁîs marisihuib hîas !Gomen-gams daoga !gâi!gâi!nâs !aroma ǂnûiǂui hâsa N$250 miljunsa xu ǁaupexa ǁaN$400 miljuns kōse go ǂnûiǀaro. 

!Ās nēs ge !gâise sîsenūs mâsib !nâ hâ tama daogu ǀkha gaxuse !gomma tsâ !goaxa, hîa nē kurib !nâ ge ǀgaisase a ǁnā ǀnanub xa îbe ge khao-ao kaihega. Nē marisihuib hîa koro kurigu ǁaeb !nâ nî ǂhāǂuihese is ge, !oa!ū !Gomenǁgams !Ā!khōmâis xa ǁ-îs ǀkhara sîsengu !aroma !khōdanahe tide, xawe nî sâuǁkhāsib omkhâis !aroma a ǀaweǁguisa !ās !nâ -ǁgoe daogu hîa ǂharugub tsî huri-ammi !naoǁhôas ǀkha a !gaeǁ-aresa sîsenga ra hui!nâgu di !gâi!gâis !aroma ǀgui sîsenūhese. 

!Gomenǁgams !ā!khōmâis di mîgowaba-aos, Anita Kaihivas ra mîsa !oagu ge nē ǁgauǂuisa daoga !hūb di sâuǁkhāsib tsî !hūba xu sîǂuis tsî ǂgâxa-ūs ǂhâbasa xūn dis !nâ ǀgaisa !âsa ra ǀhuru. “Sida ge ǁgonaǂgaos tsî ǀara kaihes ǁangāsaben tsî ǂharugu-aon disa nē daogu mâsib ǂnamipe hâsa ra ǁnâu!ā, tsî ǁnā-amaga mâ tamase nē daogu dī-ūnus sîsengu ǀkha ai!gûgaru,” tis ge ǁîsa ǁnāpas ge daogu sîsengu ai!gûs xa gere !nurimâ ǁaeb ai ge mî. 

Nēsib ge sîsenna a koro ǂhâǂhâs a ǁaxa-ūhe, ǂgaiǀons ai Allan Dean Martin !Ganni, 2ǁî !Ganni, 3ǁî !Ganni, 3ǁî !Ganni Aiǂoas dib, tsî ǀUridaob !Ganhâga. Nē daogu ge hoagu hîuǁkhāsib !nammi ai Namibiaba ra Zambiab, Botswanab tsî Zimbabweb hâgu ǀkha !Gomenǁgams !naoǁhôas !nâ-ū !hû-ǁarega. 

I ai!gûs ge ǀnai Allan Dean Martin !Ganni !nâ ra mûsen, ǁnāpab ǀnai 200 metergu !nūsib tsî 500 metergu !nūsiba a dītoasase. !Gomenǁgams di daogu !norasasib departements ge nē daogu sîsenūhe tama soab ai nî sîsenūhese hāaro ra ǀawede ge ǂgā, îs !narisa hoa !nari-aon tsî ǀnū!gû-aon !aroma !norasasiba ǁawoǁawo. 3ǁî !Ganni ge ǀnanub -ǁaegu !nâgu -ǁgamga nî !kharu!nâ ǁkhāse ra aiǂhomihe. 

Daogu !Khōdanas ǂGaes di Dana Sîsenǂuira Mâisab, Ali Ipingeb ge ge mî, Namibiab hoa!nâ-aixase ǁaupexa N$5 biljunsa hoa daoga !gâi!gâi!nâs !aroma ǂhâba hâ !khaisa. 

ǁÎb ge mîs ge, sîsenūs !aroma !gâi tama mâsib !nâ hâ daogu, aiǁgause kai!ādi !Gomenǁgams khami īdi !nâgu ge, daogu !nâ ra hâ ādi mâsiba ǁkhāti !hae -ǁaeb !nâ !gâi!gâis di xoaǁguisa ǀaweǁguib !nubusib xa ra khao-oa kaihe. 

“Daoga hoaǁae !gâi sîsenūs ǀgaub !nâ ūǀgaras ge !Gomenǁgams !aroma ǀgui ǁgoaǂuise ī tama hâ, xawe !hūb a ǂhabase hâ. Nēs !aroma da ge mîǁguiba ra dī. ǁNā-amaga da ge mîǁguiba ra dī, ǀaweǁguisa dīǀgauba ūhâsa, hâhâ nî oresa nē daogu mâsiga ūhâbas ase,” tib ge Ipingeba ge ǀamǀam.