Helao Nafidi – Minista womayambulepo eedolopa nomikunda James Sankwasa okwa indila ovakwashiwana opo va xulife po oukwamuhoko moNamibia.
Sankwasa eshi okwa ninga eindilo eli kedimbuluko lefiku lemanguluko, olo la tyapulwa kodoolopa yaShikango moshitukulwa shaHangwena.
“Namibia opo li manguluke, ina li mangululwa ashike komuhoko umwe, ndele omihoko adishe oda dana onghandangala mokukufa ombinga memanguluko eli,” Sankwasa ta holola ngaho.
Okwa holola kutya ngeenge oshilongo osha kala keshe umwe nomuhoko waye, oukumwe ngaho owa patelwa pondje.
“Ovanhu nava kale tava ende oshilongo va manguluka. Paife ovanhu vamwe ohava pitililwa po ashike keemhito shaashi ovatila oukwamuhoko,” ta holola ngaho.
Okwa ti oshilongo opo shiye komesho, ovanhu nava kale vena ohole yashili nohava tambula ko vakwao mohole nomoshili.
Sankwasa natango okwa denga yo odibo poshikumungu shoulunga unene momaliko epangelo. “Opena ovanhu vamwe mepangelo tava li ashike oimaliwa momukalo woulunga osho tashi teya po oshilongo neenghono,” ta ti. Okwa ti ngeenge oshai ngaho, nena opena vamwe tava ka kala mo nai, shaashi otava lile owishi kelambo. Sankwasa okwa lombwela yo oshiwana kutya ouministeli waye otau kondjifa okukala wa yandja omalukalwa fiyo opapa tau dulu, opo oshiwana shikale tyapula ouwa wemanguluko loshilongo.