Auleria Wakudumo
Omupresidente Netumbo Nandi Ndaitwah okwa holola kutya oshiwana nashi longife emanguluko okutunga Namibia li yamba notali ongele Ovanamibia aveshe fiyo okomapipi taeya.
Edi omupresidente okwe di holola pefimbo ta halele Ovanamibia emanguluko po00h00 youfiku okupitila komapandja ouministeli womauyelele.
“Emanguluko loshilongo ola yandja omhito iwa ku keshe umwe opo a kale ena onakudiwa ili xwepo. Okudja nena natu longeleni kumwe okulongifa emanguluko twa pewa okutunga nokuyambula po oshilongo shetu,” Omupresidente ta holola ngaho.
Nandi-Ndaitwah okwa holola yo kutya ovanhu nava pandule ombili noukumwe oo oshilongo sha kaleka po okudja kemanguluko fiyo onena.
“Natu ameneni nokukaleka po ombili yetu. Natu i nghonopeke fiyo okomapupi tae uya,” Nandi-Ndaitwah ta holola ngaho.
Omupresidente okwa ti nonande oshilongo shina omaitavelo neengulu dopapilitika da yooloka, efiku lemanguluko nali dimbulikife aveshe kutya oukwatya wovaNamibia aushe umwe nokulimanga elyenge limwe nonande omaitavelo a yooloka.
“Mefiku omu, natu ye kumwe onga omunhu umwe. Efiku eli olOvanamibia aveshe,” Omupresidente ta holola ngaho.
Okwa ti nava tale konima okutala oilonga oyo ya longwa naayo ya pumbwa elunduluko fiyo opaife. Nandi-Ndaitwah okwa ti Ovanamibia vamwe natango oveli moluhepo.
Okwa ti oupyakadi woludi eli otau kandulwapo ashike ngeenge ovanhu aveshe ova tula oukuni kumwe. Omupresidente okwa indila epangelo, omahangano opaumwene oshoyo oohandimwe opo va longele kumwe nokuyambula po oshilongo.
Omupresidente okwa holola yo kutya ngaashi a kala nokukwadjangela nale kutya Ovanamibia ova nini unene nokufya oluhepo, okwa ti oshilongo osha pumbwa okufinda omutondisaatana a kula oo eli oulingilingi.
“Oulingilingi kaushi ashike omhinge nepangelo ndele oo ekengelelo lovakwashiwana ovo vetu li neekelela oinakuwanifwa yetu,” ta ti ngaho.
Nonande omaupyakadi amwe taa twikile, omupresidente okwa ti oshiwana nashi tale yoo komaupyakadi a kandulwa po naasho epangelo la longa moule womukokomoko wemanguluko.
Namibia okwa hanga omalalakano moikondo ya yooloka ngaashi ehongo, ouhaku, eengeshefa dinini naadi dakula naikwao imwe. Nandi-Ndaitwah okwa ti epangelo otali twikile okukandula po omaupyakadi ngaashi oluhepo, ouhafikepamwe, okatongotongo, oulingilingi, eheno loilonga naakwao amwe. Okwa ti ekandule po nomaupyakadi inali ka patela kodje vakulupe, ovanhu veedula dopokati novanyasha.
Omanga epangelo tali longo nelitulemo okufinda omaudjuu aa, omupresidente okwa indila elongelo kumwe nekwafo kOvanamibia aveshe.
“Natu longeleni kumwe noku ya komesho ovanhu vaina imwe, twat ula oukuni kumwe moshili opo tu yambule po Namibia letu,” Nandi-Ndaitwah ta holola ngaho.