Ombelewa yomukalelipo waIndia moNamibia oyo i li moshilandopangelo shaNamibia, oya yandja eshivifo kOvanamibia aveshe ve na ehalo lokulihongela koIndia, va yadife eemhito dokulihongela koIndia oshali. 

Eemhito odo da patuluka nale okuyadekwa, oda teelelika di kale da pata mo15 Apilili, noda yeulukila keshe umwe. Ova yelifa kutya eemhito dokulihonga oda yandjwa koIndian Council for Cultural Relations (ICCR), oyo ili koshi yepangelo laIndia. 

“Omhito ei yokulihonga ngaha oya kwatela mo efutilo lofikola osho yo oihongwa aishe, omalukalwa ovanafikola, outekete vokufuta eedila unene ngeenge tava talele po meni laIndia, osho yo ofuto yokulonda eshina lokolutenda olo hali longifwa ongolefa yokuya keetundi,” ombelewa yomukalelipo tai yelifa. 

Ovanamibia ava va hala okukufa ombinga ova manguluka okukonga epandja lo-ICCR, ndele tava i ko ICCR’s Admissions to Alumni (A2A) Scholarship Portal, oko kuna ouyelele aushe, ko natango oku na yo omusholondodo woiputudilo ya fika pwiitano, omo keshe ou ta hadeke, e na oufemba woku hadeka keshe koshiputdilo osho a hala. 

India natango okwa yelifa kutya keshe ou ta hadeke na kale e na eedula 18 fiyo 40. Na kale yo e na ombapila yomakonakono okudilila kundokotola, ye vali nakale a kufwa omanyala kopolifi. 

-taimihaihambo2000@gmail.com