Victoria Kaapanda
Nonando Aangola yali shunwa koshilongo shawo petameko lyomwendhi nguka, oyendji oya tameka nale oku waya mooha dhoondamba taya galukile ishewe moNamibia.
Omandaaha goshiwike shika Kundana okwali a talele po oshitopolwa shaHangwena, hoka ali a mono Aangola ya thika po70 ya kalela omuti gumwe mOshikango popepi nomatala gaHelao Nafidi.
Yamwe oya kalela oositola ndhiikulya taya kwathele aantu sho taya landa, yo taya futwa uusila, ngeya humbata sigo ompoka omuntu tayi.
Oyendji okwali ya nyenyeta kutya, onkalo koshilongo shawo ya pimbile. Maria Ndinovahnu a yambukile kOnamakunde okwa ti, okulala mpano inaandi lya esiku limwe, oshi vulithe okusa kondjala.
“Sho wa talandje ngiika oto ti otandi hokolola iifundja, otwa kanitha aapambele yetu omolwa ondjala, unene aakulupe oshowo uunona uushona, sho shoka shetu kutha koshilongo shetu,” ta hokola ngaaka.
Ndinovahnu ta ti, nonando onkalo kayili nawa natango moNamibia oshi vulithe owala.
“Uunona wetu ohau lala tawu lili omolwa ondjala, ethimbo limwe ohatu katoola iikulya opo tu vule okuwu pa opo wu mwene, shampa ashike wa makela,” ta ti ngaaka.
Sam Daniel okwa ti, epangelo lyetu otali tu kolonyeke, olye tu ila moNamibia kutya otali ketu pa oshikukuta, onkalo yi kale hwepo, ihe kasha ivule.
“KoAngola megumbo limwe omuna aantu ya pita 12, ihe otamu pewa oondoha mbali dhuusila, nenge dholwishi. Oshili oondoha mbali ota dhiliwa kulye, ohatu pe ashike aakulupe nenge aanona oshoka oyo itaaya vulu okunyanga omanga tse, ta tu tala kutya otatu mono okakulya peni,” ta hokola ngaaka.
Daniel okwa popi ta ti, epangelo lyawo lyaAngola ohali ya hekeleke.
Ta pula kutya oshike ye na okumona iihuna yili ngaano? “Aaleli oye na oonkalamwenyo dhawo oombwanawa, omanga se ta tu si ondjala,” ta popi ngaaka. Gumwe natango ali pomuti mpoka pwa gongala Aangola okwa ti, uupyakandhi omboka kutya iikolitha oyi na ombiliha shi vulithe iikulya.
“Tse katu na niikolitha otwa hala iikulya yomepunda ota tu mono iihuna, tu popileni kepangelo lyetu,” ta popi ye a kengela omahondhi.
Ngoloneya goshitopolwa shaHangwena Walde Ndevashiya okwa ti, sigo ompaka inaya lopotelwa natango oshinima shili ngaaka.
“Shoka ndakundana oshoka kutya otaku kala omutumba momasiku ta geya, naanambelewa okuza koAngola guna sha nepatululo lyoongamba dhaAngola naNamibia,” ta fatulula ngaaka.
– vkaapanda@nepc.com.na