KATIMA MULILO – Bayahi ba sibaka sa Wenela bao batalimani ni kulundulwa ki ba Katengo ka Sikiliti sa Zambezi ba lelela ku lumela liponiso za linonge ku Mubusisi wa sikiliti ku supeza kusa tabela mulelo wo.
Taelo yaku lundulwa ne baifilwe ka libaka lakuli ne baikinezi isi kamulao ni kuli ba fe sibaka kwa mulelo was Green Scheme project. Linonge za bayahi ba palo yefita fa mashumi a malalu zeo neliswanela ku tambekwa ku Mubusisi was Sikiliti sa Zambezi Mutompehi Lawrence Sampofu la Bulalu biki yefelile, zeo neli bonwi ki mubihi wa makande, neli supa muńoli yo muhulu wa katengo ka Sikiliti sa Zambezi Mufumali Regiona Ndopu – Lubinda ni muinasipula wa katego ka Sikiliti sa Zambezi, ili yena Mutompehi Raphael Mbala kuba bona batu baba nyazwa mwa mulelo wo mi bao bana ni litakazo kusona sibaka seo.
Mwanonge ya liponiso yeo neipalezwi kufiwa ku mubusisi ka libaka la kuli na siyo mwa tolopo ne kusupiwa Mufumahali Ndopu – Lubinda kuba ni takazo kuona mubu wo ni ku buza kuli kanti buino bwabona mwa mandu ao a simu a kona kupaleliswa cwani milelo ya green scheme project.
“Lu bata ku ziba kuzwelela ku Mufumahali Regiona Ndopu – Lubinda kapa milelo ya Green Scheme Project i ta petahalela mwa mandu ao luina kuona kapa ki mwa simu. Ki kalibaka la sikamani Likolo la Njimo alikuzize ku amana nitaba ye?
Ki nto yezibahala kuli kuna ni babańwi kwa babeleki ba Katengo ka Sikiliti bao ba bata kuina mwa mandu lusa zwa fela mwateni. Lu bata Mufumahali Regiona Ndopu – Lubinda ni mulikanaa hae kuli ba zibahaze mulelo wa simu ya tomato yeo ba bata ku tateka kwa Wenela.” kamo ne balelwa nonge.
Bayahi bao, bangelela babeleki ba balalu ba katengo ka tolopo bao ba talusa kuli basweli ku londa kapa ku babalela mandu a kwa simu ao nasilwe feela ki ba NDC asina ba batokomela nako yeo ba feza lisebelezo za bona za bunjimi lilimo ze felile za kwa mulaho.
“Lu tilo ina kwa Wenela kalibaka la businyi bo nebuezahala. Ki sikamani seo Katengo ka Sikiliti ka ezize kwa libyana kapa liluo zeo nelisilwe feela kafani? Mandu na sinywasinywa feela nako yeo lusika tutela kwa teni.” kamo ne balelwa nonge.
Bayahi bazwezipili ku hapeleza Muinasipula wa Katengo ka Zambezi Regional Council yo hape ili yena wa litaba za naha wa silalanda sa Kabbe Mutompehi Raphael Mbala kuli u isilingasilinga mwa litaba zeo lisa muami.
“Ki kalibaka la sikamani Mutompehi Mbala habonahala kuba ni manyamenyame mwa litaba ze, kono sichaba sa hae (Kabbe constituence) inge sisweli kufenyeha kwa mezi a muunda.” lińolo la nonge lelisika nyatelwa lizwelapili.
Ka kuya ka babilaeli, bali ki zeńata libaka za muuso mwa Katima Mulilo ni mandu ao sina babaina kuona ni libaka zeo litokwa kuli katengo ka Sikiliti kubona kuli lizusezwapili isi mandu ao baina kwa Wenela.
“Kuna ni mandu a mańata a ba katengo ka sikiliti ao a sinyizwesinyizwe. Ku taha cwani kuli haisi kuama kwa Wenela? Haiba Ndopu ni mulikanaa hae ba tabela kuina kwa munanga ni nuka ba swanela ku ńola mańolo a likupo kwa katengo ka tolopo ku kuikupela. Ki zeńta saanda za muuso zeo litokwa ku yahiwa.”
Ba zwezipili hape kaku hapeleza katego ka Sikiliti ka kuketulula, ka kutalusa kuli ki kalibaka la sikamani muyaho wa manwelo a bucwala kwa sibaka sesiwana a sika fiwa lińolo la kulundulwa.
“Bezi bar isweli ku yaha miyaho ya mandu kono a basika fiwa mańolo a kulundulwa. Ki libaka la kuli ki sibaka sa mukuwa nji?” Ni hakulicwalo, Mufumahali Ndopu – Lubinda sunda ye felile na alabezi fahalimu a litaba zeo kuli ana takazo ni ye kana kuamana nisibaka seo.
“Kuamana ni libaka za muuso, akuna yana ni maata akuikenela feela mwa sibaka bakeńi sakuli sikwaluhile, mi a talusa kuli kuswanela ku latelela mikwa yeo itomilwe kakubata kusebelisa mubu kapa libyana ze zwelela kwa katengo ka Sikiliti.
“A talusa kuli yena mubeleki wa katengo ka sikiliti yoo u tafumaneha kuisilingasilinga mwa likezo ze masila u tangelwa muhato. Na likile kukenisa kuamana ni litaba za muyaho kapa pisinisi ya bucwala kuli lińolo la taelo ya kulundulwa neifilwe kale ku muzamaisi wa pinisi yeo.
Sunda yefelile nalikile kutalusa kuli linonge za bao neli babeleki ba simu sapili bao basaina kwasimu yeo litatalimwa, kono a ekeza ku talusa kuli kono milelo yeo i sitataliswa ki babeleki ba katengo ka tolopo bao ba shemaeta babańwi kuli ba kone kuchaula mwamakululu kuamana ni katengo ka sikiliti.
Likolo la Njimo nelifilwe sibaka kwa Wenela kuli ba tateke simu ya Green Scheme Project. Milelo ya ku chaula ni kutambeka linonge neipalile ku petahala bakeńi sa kusa lemusa ofice ya mubusisi wa sikiliti ka putako. Bayahi nebafilwe kuisa mafelelezo a kweli ya Lyatamani kuli bakone kuikambanga – kuzwa mwa mandu a kwa simu yeo.