Sipatelanyana sa Choto sipalezwi kufa lisebelezo za likalafo bakeňi sa pula

Home Languages Sipatelanyana sa Choto sipalezwi kufa lisebelezo za likalafo bakeňi sa pula

KATIMA MULILO – Pula ye ńata sunda ye felile isile sipatelanyana sa Choto simbwambami mwa mezi kuli mane lisebelezo za likalafo kwa sichaba lipalezwi kupetahala lizazi mukatengo.

Sitataliso yeo i tisize sichaba kupalelwa kufumana lituso zalikalafo. Sipatelanyana seo sifa lisebelezo za likalafo kwa palo ya bakuli ba mashumi a ketalizoho kazazi, kono baoki bapalezwi sa kueza haisi koba kwalile fela sipatelanyana kulitela tuso.

Ka bumai akuna tuso yene bonahezi. Nto yetisize ahulu mayemo kuba kwatasi, ki sibaka seo limbuzi liisa mezi ni zemaswe kusona se ne sifumaneha kububa kuli mayemo amakete nesi a mande kwa bakuli hamoho cwalo ni babeleki ba kiliniki.

Muoki ya sikaitukiseza libizo lahae kuzibahazwa, na ize, mayemo a sibaka seo limbuzi libubiseza mezi ni zemaswe kusona, neli bihilwe hańatańata kwa likolo la Misebezi kono hakuna sesibonahezi.

Taba ya kutiba pula hainela, ki taba ye zibwa ki ba bahulu ba likolo, mi nako kaufela lukwalanga kiliniki, kwabulela Muoki.

Ka kuya kayena, kiliniki i yahilwe mwa sibaka se sitiba mi sibaka samuyaho siswanela kuubelwa ni lishabati kuli sisike sa tiba.

“Ba swanela kutalima sibaka seo sipatelanyana siyahilwe teni, kuli siubelwe ni lishabati, kakuli ki taba ye ezahala kasilimo kusinya-sinyanga likalafo ze swanelwa kufiwa kwa bakuli,” kwa bulela Muoki.

Julia Siluta, mukuli ya napotezi kiliniki  nasika yo fumana tuso mi na fitisize ahulu maswabi ka mayemo ao. Na kutezi kwa sibaka sa hae kusina nihaike kalafo ya nafumani, nihaike natokwa kalafo ya putako.

“A nisikafumana kalafo”. Lu bulelezwi kuli sipatelanyana sikwalilwe ka libaka la kuli simwamezi.

Wa kona kuiponela mezi nihaike wena, a kopani ni mezi a maswe a simbuzi ao a pangeha kuba mazwalelo a minańi.

“Alu utwisisi ka kuli sipatelanyana si kwalanga silimo-ni silimo kono akuna sesiezwa fateni.”

Siluta na bilaezi.  Ka libaka la pula ye ńata ku bile ni lipiho za mandu a wile mwa sibaka sa naichahela sa Choto sunda yefelile.

Akuna likalabo ze fumanehile kuamana ni lipiho zeo, kuzwelela kwa Likolo la Misebezi nako yeo Mutende wo a ne u hatiswa.