Auleria Wakudumo 

Okaana keedula nhano oka xulifa eshi vati ka wilwa kokatemba keedongi oko kali ka ningwa omutala woilya poushiinda. 

Oshiingwanima osha ningilwa momukunda Iihambo Iinene mOmuthiya, sha ningwa Osoondaxa lwopo 12h00. 

Nakufya okwa tongololwa oye Mariano Amakali omukalimo womomukunda Iihambo linene. 

Edi oda kolekwa komukulunhu wopolifi moshitukulwa shaShikoto, Commissioner Teopolina Kalompo-Nashikaku. 

Otaku hokololwa Amakali ali ta danauka poushiinda namukwao umwe e fike puye, tava danaukile koshi yomuti oko kuna kwa tulikwa okatemba kadongi.

Okatemba vati okawa po omanga ounona vali tava danauka ndele taka wile Amakali. 

“Mukwao okwa tondokela keumbo looAmakali oko a hanga omunailonga womeumbo namwene weumbo nokuva shiivifila oshiningwanima,” Kalompo-Nashikaku ta ti. 

Otaku hokololwa mwene weumbo nomunailonga va kendabala okukufa ko okatemba ashike ova hanga nale Amakali a xulifa. 

Oshingwanima shikwao, omumati weedula 19, omutonateli womaliko okwa xulifa eshi vati a yashwa komutonateli womaliko mukwao, omukwashiwana waAngola weedula inadi didilikwa. 

Oshiningwanima eshi osha ningilwa poEno Market momukunda Omuntele, Olomakaya lwopo 01h22. 

Nakufya okwa tongololwa oye Teofelus Lukas. 

Opolifi oya holola kutya omufekelwa nanakuningwa oshihakanwa aveshe ovali hava tonatele omaliko ponhele imwe. 

Otaku hokololwa kutya ovanailonga vakwao ovo va uda omutopo wondjebo nashi va ka tala eshi sha ningwa po, oveli twa Lukas eli mekungu lohonde a yashwa vati kumukwao. 

Opolifi oya holola kutya osheetifi shediapao inashi shiifika natango. 

Oshiningwanima shikwao, omulumenhu weedula 30 okwa xulifa eshi vati a tuwa nombele komufekelwa weedula 21. 

Oshiningwanima eshi osha ningilwa pobar hai ifanwa Classic mOkahao, Osoondaxa lwopo 02h20. 

Nakufya okwa tongololwa oye Tomas Sheya. 

Otaku hokololwa omufekelwa vati a pitila eenhamanana namwene wonduda molwaashi efimbo lokupata la fika. 

“Tete okwa udula omuvelo eshi tau idilwa ndele tau denge mwene wonduda. 

Okwa twikila nokuningila mwene wonduda omatilifo kutya etemu tu nombele ashike mwene wonduda okwa haulaka po ndele ta ka valula oimaliwa nomulandifi,” opolifi tai holola. 

Konima okwa ka pilukila po vati nakuninga oshihakanwa ali pondje ndele tem utu nombele mofingo. 

nakuningwa oshihakanwa okwali a twalwa koshipangelo oko a xulifila. 

-wakudumoauleria@gmail.com