Uuministeli womindhingoloko iixwa nomapashiyono owa ti iipotha yuulunga wiinamwenyo otayi ende yuuka pevi okuyelekanitha nomimvo dhapiti. 

Oompanda owala ntano nondjamba yimwe dha dhipagwa noku kuthwa omayego kaafuthi nuumvo , oku yelekanitha nomumvo gwayi okuza muJanuali sigo oMalitsa moka oompanda dhili 28 odhali dha dhipagwa shaali pa veta. 

Uuministeli owa ti aanambelewa oshowo aapolisi yomEtosha otaya longo nuundhiginini opo ku hulithwe po uulunga wiiyamakuti. 

Sho kwali kwa ningwa oshigongi shina sha nuulunga wiyamakuti mOshana, omupevikuluntu mEtosha Naambo Iipinge okwa ti, mboka taya dhipaga oompanda ohaya tumwa kaantu. 

“Etosha olyi na okugamenwa omolwongushu yuushitwe lyi na nongele uushitwe mboka owa hanagulwa po, ota tu kanitha oshindji,” ta fatulula ngaaka. 

Ta ti, aatalelipo ohaya hilwa unene koompanda oonduudhe noontokele oshowo uushitwe wu li mEtosha. 

Ta fatulula kutya aatelelipo mboka haya hilwa kuushitwe ohaya yambidhidha noshimaliwa shi thike poomilliona N$40 hayi yi moshiketha shepangelo. 

Omupevi-kuluntu gwokiitopolwa yokonooli Rehabian Erkie okwa popi kutya oompanda ohadhi kwata oomvula omugoyi oku koka. 

“Ngele otwe dhi dhipaga po otadhi ka za we peni ngele ohadhi kwata ethimbo alihe ndyoka okukoka, naatalelipo ohaya hilwa koompanda ndhoka,” ta nyenyeyta ngaaka. 

Kansela gwoshikandjohogololo Uukwiyuushona Andreas Amundjindi okwa ti, aakeeleli yiiyamakuti oye na mo sha medhipago lyiiyamakuti. 

“Ongiini iiyamakuti tayi tsikile okudhipagwa omanga aanambelewa taya patolola, kokutya oyo haya gandja uuyelele kombinga hoka taya longele opo ya longe iilonga yawo nawa,” ta ti ngaaka. 

Ta gwedha po kutya oshihwepo ngele aakeeleli taya kala ihaaya longo noongodhi dhawo dhopeke, yo taya pewa uuradio wokulonga nawo. 

vkaapanda@nepc.com.na