OSHAKATI – Olundji ngele ku na omaudhano, aagundjuka oyendji ohaya ningi aashona momapandaanda, oshoka ohaya ka kaalela uupale womaudhano, shoka tashi ulike ohokwe ye na nomaudhano.

Ngoloneya gwoshitopolwa shaShana Hofni Iipinge okwa ti, omaudhano oga simana monkalamwenyo yomuntu oshoka ohaga nyanyudha aalanduli osho wo aadhani noku ya kaleka kokule niinima inaayi uka. “Sho osho shoka oshitopolwa shaShana tashi longo nuudhiginini okuyambidhidha nokuhwahwameka omaudhano osho wo okuya po nomala gomaudhano,” ta fatulula ngaaka. 

Omuhwahwameki gwomOshakati Penda Mbangula, okwa ti, aanyasha oyendji oya hulila momapandaanda omolwomatempelo ga yooloka.  

Ta ti, oku na edhiladhilo lyokuya po nomadhewo, omawudhano osho wo iinyangadhalwa yilwe, unene momalukanda ageshe gaShakati, oshoka okwa ndhindhilike kutya uunona osho wo aanyasha mboka haya zi momalukanda, ohaya hulile momapandanda oshoka kaye na shoka ya i pyakadhila na sho.

 “Ondi na ohokwe nomadhiladhilo ogendji okuya po noopoloyeka dha yooloka, okudhewula oshowo okugandja omalongo kaanyasha, opo ya kala ya iipyakadhila uuna taya zi koosikola nenge mboka yeli momagumbo taya kongo iilonga,” Mbangula ta popi ngaaka.

Ta ti edhiladhilo ndyoka okwa li eya po nalyo, oshoka monkalo a zi muyo okwa li a yi mo oshoka ka kwali ena shoka tashi vulu okungungumaneka omadhiladhilo ge, ngaashi iinyangadhalwa a zi nokuyi tumbula. 

Mbangula natango okwa indile Uuminisiteli womadhano wukambadhale ngaa mpoka tawu vulu opowu to te po omahala gomayinyanyudho, hoka aanyasha taya vulu okuya uuna kaa yena sho taya ningi. 

Natango okwa indile ngoka ena omadhiladhilo taga tsu kumwe na ye, no taya vulu okulongela kumwe okuya po na shimwe, a kale a manguluka okuthika puye etaye shi tula miilonga, ta ti okwa tokola okushitula miilonga omayimbidhidho ashike a pumbwa. 

“Ta ti shoka otashi ka kwathela oyendji ya pikwa komalovu, komakaya oshowo iingangamithi mbyoka hayi pike aanyasha no kuya longitha iinima inayi uka,” Mbangula ta fatulula.  

Lavinia Shilongo ngoka ha landitha oombilitongo, okwa ti okuhole ngele mokapale kOshakati ke na omaudhano oshoka ongeshefa ye ohayi ende nawa.

“Ohandi landitha nawa, oshoka okapale ohaka kala kuudha nawa, ohandi kala nda hala ngeno kehe mehuulilo shiwike okapale oke na omaudhano opo ndi mone okathilinga kandje,” ta popi ngaaka.

-vkaapanda@nepc.com.na